Butcher Cut JA和牛套餐 開箱報告

首輪試伏

首先要同支持"王家飯館"嘅朋友仔講聲唔好意思🙇🙇🙇，咁耐都唔update一次真係唔啱嘅，雖然成年無出Blog但都多咗一萬人瀏覽真心多謝你哋對呢個Blog有興趣及請原諒呢個咁懒嘅Blogger。王家煮人過去一年真係有點小忙，要創業、教班又要研究產品(再加上非常懒，雖然手頭上有一堆片同相，就係唔願郁)，希望你哋仲記得我啦~新嘅一年新開始，請大家繼續指教! (唓!睇下你做得幾耐…)

講番啲牛扒先，以前去開Aeon買啲百幾二百蚊左右嘅牛扒間唔中吓食都唔錯，但裝修完之後換咗另一間就似乎無咩唔同只係價錢多咗大約三分一，而UNY嘅Dry Age係好靚，但又唔會富貴到個個星期都食囉。最後走上網睇下買開芝士果間嘅牛扒點(因為佢啲豬鞍唔錯㗎，下次介紹吓)，但都唔係好啱心水，最後就响Facebook嘅廣告見到Butcher Cut，價錢唔算貴但又未去到笑呵呵咁平，最優惠都算係套餐，見到都有唔少人留言問過幾錢、有無貨…大家都知呢啲留言係可以買嘅，所以我就向谷歌大神請教一下，點知竟然一個留言都搵唔到…無人講?咩料呀!

Butcher Cut嘅選擇唔多來來去去都係得果幾個套餐好似唔係好專門咁，不過呢個價錢可以食到和牛又係一個唔錯嘅選擇喎，之前都有介紹過大家响HKTV MALL用$198就買到200G和牛套餐真係大件又抵食(已經好耐無再見過呢個套餐出現喇)，如果呢間和牛有水準的話都咪話唔抵食。