新派石垣牛漢堡
第一次嚟石垣少不免會跟一啲網上資訊去搵嘢食，我都唔例外咁要去試吓石垣牛漢堡包，本來係想試吓碼頭對面果間牧場出品，但係去到時見到成座建築物都圍晒似係裝修咁，就只有去遠少少嘅第二選擇。
叫佢做第二選擇唔係因為無咁好食只係距離碼頭比較遠，當初我哋都怕一落機就去西表可能時間上比較緊迫所以首選最近又最簡單快脆嘅食物。但有咗第一次經驗後我知道由落機到攞行李都唔洗30分鐘同之前响網上見到嘅好唔同，就知道有成個鐘頭預多咗。
點解會有咁大分別呢?應該係買咗U-frist同無買嘅分別，我想去翠華食個早餐再慢慢入閘等上機，如果Check-in要排隊等兩個鐘係會令王大少唔耐煩，雖然都梗食咗個職員嘅黑面(都唔明佢已經係坐咗個好舒服嘅崗位客人又唔多無咩做，但幫我哋Check-in時都係黑面無禮貌嘅，唔通呢啲就係佢哋公司嘅標誌?)，買咗又可以坐前啲同行李優先，出機場就會快好多，雖然航班係朝早7:40但我都會好乖咁5點左右就到機場，不過聽人講唔買都係太約30分鐘就出到機場，咁買唔買都係個人喜好。
但經過今次我就知道呢程機唔需要買餐點(第一次搭廉航嘅大鄉里)，開頭係怕太早食早餐會肚餓所以訂咗三文治同熱狗，最起碼唔洗餓鬼咁落機。但係真係食唔落喎，唔係因為唔好食，其實熱咗比你又會有幾難食呢?不過真係唔肚餓要王大少幫手食埋佢。回程都係一樣買咗三文治同熱狗，同樣都係怕回程到港時間係中午1點，返到屋企就唔會再想出去就諗住响飛機食咗就算，同樣地都係食唔落嘅。其實應該買定杯麵响屋企真係想食先食，到最後响飛機都係食咗少少直到晚餐先再食過(又係王大少食埋，我哋都唔想浪費食物)。
講番呢個漢堡包先，由於唔肚餓嘅關係又怕食唔出味道會失望，一般都會點一、兩個招牌食品，最起碼即時知道呢間餐廳我仲會唔會再去。點完餐比埋錢就可以坐定定等食喇，點咗好多人都會點嘅牛油果日本芥辣石垣牛漢堡(¥930)、Mozzarella 芝士石垣牛漢堡(¥1490)。
牛油果日本芥辣石垣牛漢堡(¥930)要咗個沙律伴碟，淡淡牛油果同日本芥辣嘅香氣配會得宜，正體味道清新又唔會覺得牛肉會過份油膩，都係一個唔錯嘅選擇。
Mozzarella 芝士石垣牛漢堡(¥1490)配薯條，下次可以唔洗再配薯條，本人覺得薯條係有啲失色嘅，但個漢堡就真係不得了，超多嘅芝士再配埋充滿肉汁嘅牛肉實在令人驚喜。
雖然係飽住個肚嚟試，但都無令人覺得係食錯嘅，但係杯熱咖啡就始終唔係我杯茶，下次試下個凍咖啡睇下會唔好好啲。
食完就要向碼頭出發去今次嘅重點之一 ~ 西表島
出發前已經响安栄網上預約船票，一嚟安全感大啲二嚟仲會平少少好似訂咗就會安心啲，不過唔訂都無所謂又唔係真係平好多而且攞飛時都多咗啲手續，訂唔訂都係個人喜好啦~
我哋係攞咗飛先去食嘢，佢哋可以幫忙暫存行李，不過只限一小時，大家要留意呀!
由於之前唔係有太多關於碼頭設施嘅資料，唔清楚可唔可以比錢寄存行李，就算見到碼頭有Locker可以寄存都無辦法要推晒啲行李入島，因為行李無分類又唔想即場表現執行李，不過就真係好麻煩要拎咁多嘢係去，不過下次就知道可以寄存就可以輕鬆跳島喇。
成個碼頭有4個地方放置行李櫃，仲有就找換機方便唔夠零錢嘅朋友，仲有埋英文說明仲要圖文並荗，大家可以放心嚟個輕鬆旅程不過大家要留意最長只可存於4日。
石垣第一旅 ~ 行程簡介
30/5 Day 1：石垣機場 → 石垣碼頭 → Vanilla-Deli → 西表島モンスーン民宿
31/5 Day 2：西表島浮潛 ~ バラス島＆鳩間島一日遊
1/6 Day 3：西表島浮潛 ~ バラス島半日遊
2/6 Day 4：島料理あちまゆん → Lulaliya民宿 → ひとし本店
3/6 Day 5：深潛、浮潛睇魔鬼魚半日遊 → ちねんや～新川店
4/6 Day 6：深潛溫泉海底半日遊 → 石垣牛ケバブ Kaboo → 山ちゃんの部屋
5/6 Day 7：向日葵花田 → 平久保平燈塔 → Seven Colors → 米原海灘 → 石垣屋
6/6 Day 8：石田屋 Ishidaya → ANA International Hotel → China Shadow
7-8/6 Day 9~10：海釣體驗半日遊 → JA ゆらてぃく市場 → 石垣牛と海鮮の店 てっぺん
🌻喜歡請比👍Like👍
🌻歡迎各位分享、讚好及訂閱【王家飯館】的網頁、Facebook、Instagram、YouTube
google.com, pub-3073176370794589, DIRECT, f08c47fec0942fa0
