好多人都鍾意嘅酒店又係咪啱自己呢?
今次住呢間酒店係全程最貴嘅一間，一如以往都會安排比較好吧酒店响旅程最尾段可以真正放鬆身心，仲特別加錢安排咗最邊邊嘅房間，諗住可以有個"L"型露台可以望得更多、更遠、更好風景、更寧靜(因為都知道呢間酒店出名多家庭團體會比較多小朋友)，可惜天意弄人酒店安排咗呢近新翼果邊嘅房間，結果被新翼遮住美好嘅風景，再加上哥爾夫球場有大型動工真係大煞風景。
大家睇相都知酒店設備大概係點，地方係舒服同乾淨嘅，窩心位係酒店知道我就嚟生日都會送甜品到房，唔係一件少少嘅蛋糕而係一碟水果甜品拼盤。(留意番住果兩日唔係生日，只係同一個月啫，但酒店都好大方送上心意，重點係無人話佢知只係Check-in時見到我係呢個月生日咋)
選呢間酒店除咗想假期尾聲可以真正放鬆之外係因為佢近機場(比起之前住果間民宿的確係近啲)，而且沙灘果邊可以放煙花同觀星，但要响呢度同大家講清楚一啲，日本係唔可以亂咁放煙花嘅，一定要响指定位置及帶備水桶(水杯也可，視乎煙花大少所需)，將放完嘅煙花放入水桶中令火種完全熄滅，並收拾所有垃圾才離開。而ANA可以放煙花嘅地方有兩個，一邊係沙灘左邊及沙灘右邊，兩邊都係要過咗堤壩先係放煙花嘅地方，呢個係問酒店經理得知嘅資訊，佢仲好好人教我哋邊度有煙花賣同邊度扺，仲要提提大家最好買定防風火機，試過第一晚係點唔著嘅，第二日即刻買返個先可以順利放到，但都係風太大放出嚟嘅煙花效果唔係好靚。過咗堤壩後會比較多石頭要小心留意。希望各位唔好貪方便响沙灘就放，唔好做一個唔受歡迎嘅旅客。
早餐種類唔少而且幾啱食不過真係人太多了，差不多每張枱都要排隊，再加上遇到一啲無品嘅旅客真係令人唔開心，是咁的，咁啱行到去冷盤枱見到工作人員攞碟煙三文魚放好，職員都未轉身就比隔離果位客人掃咗大半碟得番4塊响碟，我同隔離果個女仔都想攞，好彩每人都分到兩件，但係第4位客人就真係唔好意思喇。其實成碟有成廿幾塊做咩唔可以分甘同味咁自私要咁做呢?佢同原碟攞走其實無分別。我都係鍾意之前兩間民宿嘅早餐，雖然唔係咩貴嘢，但多了一份人情味同唔洗排隊坐定定就有得食。無影相係因為呢兩日人實在太多，兩日都只係快快趣食完一轉就算，連王大少都無去攞第二轉。
至於沙灘就有唔少礁石著鞋落水會比較好啲，其實可以游水嘅範圍唔係好大，外圍係其他水上活動區及Water Park(呢個應該係最受小朋友歡迎嘅地方，因為無入過去所以唔知價錢係點)，雖然沙灘有唔少礁石但魚唔多，比起米原真係差得遠。至於水清唔清係同天氣有關，我去咗個沙灘一次水唔太清但人好多。
今次係响酒店網頁訂房，因為一般酒店網無我想要嘅邊房只好同酒店訂，不過咁啱係有優惠所以價錢仲比一般酒店網平少少，但就有條件取消及要比咗錢先。
今次仲試咗酒店嘅中菜餐廳，因為入住客人有折扣券計番都唔貴，加上連日來咁大運動量去到間休閒酒店就連出去食飯嘅氣力都無，咁啱當晚又無訂餐廳就去試試，遲啲再同大家報告詳情。
InterContinental ANA Ishigaki
地址：354-1 Maesato : Ishigaki-shi , Okinawa ,907-0002, Japan
電話：+81-980-887111網頁：https://www.ihg.com/intercontinental/hotels/us/en/okinawa/okahb/hoteldetail
價錢：63840日元 (31920日元/晚)
再戰石垣 27/9 - 5/10
西表島浮潛、夜釣、波照間島、石垣海釣、米原浮潛Maru 串燒店、はーりー椰子蟹、石垣屋、燒肉金城、十五番地、
一龍居酒屋、Papiru 人氣蛋糕店
西表島モンスーン民宿、Lulaliya民宿、Hotel WBF PORTO Ishigakijima、碼頭租車
石垣第一旅 ~ 行程簡介
30/5 Day 1：石垣機場 → 石垣碼頭 → Vanilla-Deli → 西表島モンスーン民宿
31/5 Day 2：西表島浮潛 ~ バラス島＆鳩間島一日遊
1/6 Day 3：西表島浮潛 ~ バラス島半日遊
2/6 Day 4：島料理あちまゆん → Lulaliya民宿 → ひとし本店
3/6 Day 5：深潛、浮潛睇魔鬼魚半日遊 → ちねんや～新川店
4/6 Day 6：深潛溫泉海底半日遊 → 石垣牛ケバブ Kaboo → 山ちゃんの部屋
5/6 Day 7：向日葵花田 → 平久保平燈塔 → Seven Colors → 米原海灘 → 石垣屋
6/6 Day 8：石田屋 Ishidaya → ANA International Hotel → China Shadow
7-8/6 Day 9~10：海釣體驗半日遊 → JA ゆらてぃく市場 → 石垣牛と海鮮の店 てっぺん
🌻歡迎各位分享、讚好及訂閱【王家飯館】的網頁、Facebook、Instagram、YouTube
沒有留言:
發佈留言