2019-09-29 西表島 → 石垣
離開，係為咗下次再來
食完早餐就要離開民宿就算有幾唔捨得都要動身，去到西表碼頭已經感受到颱風嘅威力，大雨到似香港黑雨咁搞到我哋成身濕晒，留意番我哋只係落咗車行去車尾攞行李，只要行兩步就有遮蔭都可以濕晒，好在預早咗時間去碼頭可以等個身乾啲先再上船咋。上船前都預咗會大浪，但都比想像中好，再加埋上船就訓著，所以唔會好怕。前一晚已經同王大少傾好早一日出番石垣要做啲咩，當然就係去超市入定貨先，雖然個風係聽晚先到，但因為今晚間酒店只係住一晚，如果要轉酒店又要入貨就會搞到好忙咁，唔合乎王大少嘅生活態度。而且打風果朝早先買實多人，所以一到埗就攞車再去超市，今次都係响石垣碼頭果間租車公司租車，同上次果個店員唔同咗，上次係無人响舖，打比佢好似响屋企訓緊咁，最後要等咗個幾鐘先見人，有諗過訂過第二間租車公司，但諗到要攞住啲行理搭巴士王大少就十萬個唔願意，所以比多次機會佢，好在今次店員一早做好準備等我哋，比完錢架車就已經泊响門口等。
租車資料：
HARO Car Rental
電話： 0980-87-5603
地址：〒907-0012 沖縄県石垣市美崎町1石垣港離島ターミナル1F
https://harorentacar.jp/
29/9~5/10 (60小時+4日) 基本租車費￥32,000
機場還車收費￥1,000
保險費 ￥1,100 X 7日=￥7,700
總數￥40,700 (HK$2,930)
搵咗車就去石垣最大果間AEON，見到人數都唔少但貨源充足，不過排隊比錢都等咗半個鐘，真係唔敢想像打風當日先買一定仲多人。不過大家要留意只係買夠食夠用嘅數量就算，留番啲資源比真正有需要嘅當地人。
因為今日係意料之外無安排到任何活動，王大少就話試下Walk-in石垣屋燒肉睇下有無位，睇佢都係怕嚟緊兩日可能會無啖好食而家要食好啲，12點前去到有位都唔出奇，最奇係我哋坐返上次果個位，只係上次食晚餐今次就食午餐，就算坐返同一個位不過今次日光日白可以睇到外面嘅風景。
今次再嚟緊係要叫王大少好欣賞嘅石垣牛壽司啦…
今次叫咗兩個中午先有嘅套餐+4件手握壽司，食物質素同上次嘅晚餐差唔多，只係多咗個午餐選擇所以平咗。
睇過唔少網民都話石垣屋唔抵食，其實我都想講下佢真係唔係行抵食路線~我哋都有食過山ちゃんの部屋嘅燒肉真心抵食夾大件，只係肉嘅質素就同石垣屋/石田屋呢類店舖有距離喇。即係食開元氣去食Omakase覺得份量少、選擇少同價錢貴都係能夠明白嘅，每個人嘅口味都唔同，所以我睇食評都會睇埋作者之前食過嘅店舖同我去食嘅味道差幾遠先決定信唔信~因為實在有太多人喜歡用傷害人嘅手法抬高自己，真係好睇唔過眼~
我嘅性價比係用相同質素嘅食物去比較價錢，石垣屋西冷200G套餐係¥9000=(大約HK$650)，仲包括埋白飯、沙律、湯、甜品同兩隻蝦；香港超市買到嘅石垣牛西冷200G都唔只1千啦。
睇番2019年5月石垣屋晚餐請按我
食完飯就要去今晚要住嘅 Hotel WBF PORTO Ishigakijima，上一篇都提過係因為颱風嘅關係臨時臨急訂嘅，三百幾蚊市區仲有房都無得我再考慮。
泊車係要收錢嘅但就唔記得一晚係幾錢喇，酒店係有兩邊嘅，我哋Check-in完就過去另一個大廈入口入房，好在我一個人去搞手續先，搞完出返嚟再推行李去另一邊，咁就唔洗推嚟推去。
酒店係唔可以吸煙嘅，有需要可以去酒店門口附近嘅指定吸煙區，不過就要留意一下指定吸煙區果個係煙灰缸，啲人就好順手將唔要嘅嘢放埋入去搞到我哋行過都要吸入濃煙仲要搵酒店人員清理(因為我怕大風吹走啲火苗會引起火警就麻煩喇)，佢哋都好似好熟練咁响櫃底搵支水就跟我出去睇，咁即係話有唔少嘅人咁無公德心。其實日本街頭無垃圾桶都好多年，自己垃圾自己帶走是常識吧!
仲有一件事要同大家分享，話說我哋間房係响走廊嘅盡頭，訓到半夜王大少就聽到一男一女响走廊大聲講嘢，可能係飲醉咗嘅關係聽唔到佢哋係嚟自邊個地區…但一定係無公德心嘅人。
Hotel WBF PORTO Ishigakijima總結：市中心區附近有好多食市，地方乾淨舒適，呢個價錢好抵住(其實我訂果個價錢真係一轉眼，而家再睇都要$500起)
晚餐就去返上次亂入又好味嘅餐廳島料理あちまゆん，不過今次就有少少失望，因為我最想食嘅招牌牛肉麵賣晒喇!!!
呢排真係懶咗好多，希望Part III唔洗再等幾個月先出到啦…知喇，你哋想知我哋食完椰子蟹有咩報告丫嘛…收到喇!
再戰石垣 27/9 - 5/10
西表島浮潛、夜釣、波照間島、石垣海釣、米原浮潛Maru 串燒店、はーりー椰子蟹、石垣屋、燒肉金城、十五番地、
一龍居酒屋、Papiru 人氣蛋糕店
西表島モンスーン民宿、Lulaliya民宿、Hotel WBF PORTO Ishigakijima、碼頭租車
石垣第一旅 ~ 行程簡介
30/5 Day 1：石垣機場 → 石垣碼頭 → Vanilla-Deli → 西表島モンスーン民宿
31/5 Day 2：西表島浮潛 ~ バラス島＆鳩間島一日遊
1/6 Day 3：西表島浮潛 ~ バラス島半日遊
2/6 Day 4：島料理あちまゆん → Lulaliya民宿 → ひとし本店
3/6 Day 5：深潛、浮潛睇魔鬼魚半日遊 → ちねんや～新川店
4/6 Day 6：深潛溫泉海底半日遊 → 石垣牛ケバブ Kaboo → 山ちゃんの部屋
5/6 Day 7：向日葵花田 → 平久保平燈塔 → Seven Colors → 米原海灘 → 石垣屋
6/6 Day 8：石田屋 Ishidaya → ANA International Hotel → China Shadow
7-8/6 Day 9~10：海釣體驗半日遊 → JA ゆらてぃく市場 → 石垣牛と海鮮の店 てっぺん
🌻歡迎各位分享、讚好及訂閱【王家飯館】的網頁、Facebook、Instagram、YouTube
沒有留言:
發佈留言