石垣第一旅 ~ 海釣 試玩報告

大魚來了

雖然不是第在日本海岸釣魚，但今次是一個好好的體驗。由於行程安排出現問題，可能是人數不足吧!旅行社說是因為端午節要扒龍舟所有的航道也封鎖，不得不安排到別的日子，其實真係唔知道係咪真，因為無問過其他當地人所以不敢講係唔係真有其事，只係呢間旅行社有不實先例不由得心生懷疑。話說出發前王大少突然話想睇螢火蟲，我只可以臨時找這旅行社安排一下，由之前經驗都知道佢哋回覆唔算快，而且可以當日或之前一日先約都可以，咁我就等西表島返嚟先再決定，點知响西表島想參加螢火蟲參觀團時民宿主人話季節在月中已經過了，五月中已經結束了…咁點解呢間旅行團仲話有呢？咁又係，睇唔到都係我哋唔好彩啫，唔關旅行社事，邊個叫你夏天去睇極光，冬天去追午夜太陽呢？


講返呢個海釣團先，向網上訂位及交訂金，當日再比埋尾數就得喇，當日朝早約咗响KFC等跟住佢哋架車轉去碼頭泊低車，如果唔係自駕的話應該會有接送，去到比埋尾數就上船，只係旅行社職員係唔會跟住上船亦唔會返嚟接你，因為同行另一位客人李先生係一個人嚟石垣釣魚，而且亦無揸車都唔知最後佢係點返酒店~

講到船上嘅船長同助手都係日本人，仲要係好有經驗嘅釣手，我哋一路釣佢哋就响附近用假魚餌測試，第一個點就已經大有收獲，同行嘅李先生係釣魚常客，雖然係第一次响石垣釣，但佢嘅技術令佢釣到好多魚其中一條仲好大條，不過唔好問我幾重因為我唔識點分。

呢位好細心教導嘅就係船長BOB，另一位係今次嘅釣友李先生

船長BOB同助手好細心教我哋釣魚，見我哋都有經驗就只係觀察同傾吓計，每當有魚上釣都會比我哋更加緊張同教路可以點樣容易收絲同準備好"撈磯"幫我哋上魚。當中又好會搞氣氛令過程不會覺得沉悶，對住咁樣嘅大海同親和嘅船長及船員，再加上一位有善嘅釣友(呢樣嘢係好睇你嘅運氣，我哋今次很好能遇到李先生)。我哋用嘅魚餌係南極蝦(好似係呢個名)，聽講係好吸引魚類，如果放魚餌落水過咗幾分鐘都無魚咬，船長就會叫我哋換過啲魚餌，超大方呀!

呢條就係李先生嘅漁獲之一我只係借嚟影相啫，由於條魚真係好大條，影完相仲有啲手震呀!
唔好以為我只係借人哋啲魚嚟影相自己就無收穫…有圖有真相。

呢條就係我嘅收穫之一，船長話呢條魚用嚟做魚生好好味，但好可惜我哋一早已經訂好晚餐，同呢個美味無緣了。上釣過程我諗起都覺得好笑，當有份量嘅魚上釣時由於有一定重量所以我要好用力去收回魚絲，船長叫我企响身會易啲收絲，我試過但係企唔穏，再加上一上鈎就知道條魚好重一邊收絲一邊叫，我都唔知啲力氣响邊度嚟，一路絞就一路叫直到大魚上船先收聲，呢個過程都有幾分鐘，同船人士只係不停咁笑，笑我實在叫得太瘋癲吧!所以我每次有魚上釣佢哋都會用我嘅叫聲嚟分辨條魚嘅大細。

而"佛系"嘅王大少當然有收穫啦，不過佢再唔係最多同最大條果位。不過有佢响度幫手餵魚都算係有幫助丫。其實我哋都釣咗唔少魚，不過有部份選擇放生只係留咗7條由李先生帶走，聽佢講係船長帶到一間冷藏庫服務公司冷藏，再約好取魚時間就可以，冷藏公司會收返 ¥1000/日(好似係日計)，用發泡膠盒放好就可以寄倉帶回家享用。曾經聽過有朋友响石垣帶魚漁獲返港得發現肚內生滿蟲，我估計係因為漁獲急凍前未有開肚取出內臟而做成嘅，因為回港當日遇到一班釣魚發燒友帶咗幾箱漁獲回港，佢哋話全話都已經開肚所以從來無發現過有蟲情況，如果想帶漁獲返嚟嘅朋友記得帶多把刀即場開肚取內臟喇。如果想即晚食用都可以搵船長幫你搵間居酒屋搞掂，如果想即日中午就食嘅朋友要留意，上岸都已經1點唔會有居酒屋做到，因為開一條魚起肉到上枱係需要時間嘅，一般食市都會有落場時間，好多都唔接受即場做午餐，就算肯做上到枱都可能係下午茶喇。

船上有冰箱及冰塊供應，方便你將飲品保溫，另一個冰箱係用嚟放漁獲再加一個箱用嚟放乾品，等你可以放心又輕鬆咁進行活動。只要帶飲品、乾糧(如需要)就可以玩，圑費包魚餌、魚竿、救生衣…等等。至於幾錢就留番你哋自己去問下，我就經中介訂所以一定比直接問船長貴，但就要有心理準備未必完全理解特別需要，有興趣可以自己問下船長幾錢。

Reef Skater
電話：090-8290-0162
地址：沖繩県石垣市大浜377-301
網址：https://isigakinohito.wixsite.com/reefskater（頁內有查詢及預約，可以用英語溝通）

再戰石垣 27/9 - 5/10 

西表島浮潛、夜釣、波照間島、石垣海釣、米原浮潛
Maru 串燒店、はーりー椰子蟹、石垣屋、燒肉金城、十五番地、
一龍居酒屋、Papiru 人氣蛋糕店
西表島モンスーン民宿、Lulaliya民宿、Hotel WBF PORTO Ishigakijima、碼頭租車

石垣第一旅 ~ 行程簡介
30/5 Day 1：石垣機場 → 石垣碼頭 → Vanilla-Deli → 西表島モンスーン民宿
31/5 Day 2：西表島浮潛 ~ バラス島＆鳩間島一日遊
1/6   Day 3：西表島浮潛 ~ バラス島半日遊
2/6   Day 4：島料理あちまゆん → Lulaliya民宿 → ひとし本店
3/6   Day 5：深潛、浮潛睇魔鬼魚半日遊 → ちねんや～新川店
4/6   Day 6：深潛溫泉海底半日遊 → 石垣牛ケバブ Kaboo →  山ちゃんの部屋
5/6   Day 7：向日葵花田 → 平久保平燈塔 → Seven Colors → 米原海灘 → 石垣屋
6/6   Day 8：石田屋 Ishidaya → ANA International Hotel → China Shadow
7-8/6 Day 9~10：海釣體驗半日遊 → JA ゆらてぃく市場 → 石垣牛と海鮮の店 てっぺん

🌻歡迎各位分享、讚好及訂閱【王家飯館】的網頁、Facebook、Instagram、YouTube