2019-09-30 石垣 (風雨中度過)
第一次响日本遇到颱風
朝早一早就起身食咗個杯麵同烚蛋做早餐,話晒個風今晚就到唔想再四圍搵食嘢嘅地方,同埋要搬酒店烚熟咗就方便帶,雖然係烚蛋但都要做到糖心蛋王大少先會食嘅。根據上次嘅經驗知道由市區到民宿係有一段路經海旁嘅,所以佢好緊張想早啲去到民宿,避開大風時所做成嘅橫流,千其唔好睇少陣風,係可以令你由慢線吹到去快線,之前响沖繩試過都咪話唔驚,好在沖繩果次有兩條線,唔係就真係唔敢想像。石垣好多都係單線行車,特別係海旁果段路又窄又多彎,所以就想响個風未到之前入民宿先。
放低行李就趁無咩風出去睇吓有無食市開門,食對於王大少係一件好重要嘅事,只可惜附近舖頭都無開門,連泊响川平灣嘅船都全部去晒避風,真係好難得會影到張無船嘅川平灣。雖然望落去風平浪靜不過天色開始暗,其實果時仲係11點咋。
中午果餐只好响房食杯麵同糖心蛋,好在民宿通知夠材料做晚餐比我哋,唔係嘅話又要食杯麵喇。
一杯熱騰騰嘅洋蔥湯已經好窩心,鍾意洋蔥嘅王大少一滴都唔放過。
呢個煙肉意粉簡簡單單但味道十足,每啖都係愛心特別係出面橫風橫雨嘅時候。
晚餐時段坐滿都係香港人,上次嚟都係得一個今次就全部都係,仲偷聽到佢哋話見過群組有人响呢個民宿影嘅銀河好正,唔洗四圍去上天台就睇到…哈哈,多謝你哋咁欣賞!不過佢哋好唔好彩遇著天氣唔好,住呢幾日無得上天台睇星。
無呃你哋架…睇到睇唔到都好講運氣…
2019-10-01 石垣 (風雨中度過)
風雨中的結婚紀念日
鍾意呢間民宿其中一個原因係佢哋嘅早餐好好味又多樣化,咁先有個好開始丫嘛…雖然今日無安排任何活動~
既然外面回復平靜一於出去行吓,其中一個原因係前一晚安部先生請我哋食咗件豬潤,送啤酒/紅酒真係不得了,所以即時出城大手入貨。
原本諗住去Vanilla-Deli食漢堡包,點知去到見佢緊急維修中,應該係之前一晚颱風嘅影響搞到店舖漏水唔可以做生意…咁點算好呢?行嚟行去都諗唔到食咩好就求其走咗入金城燒肉,呢間真係唔推…等又等得耐、肉質又普通,套餐隻蝦仲係冰嚟…我唔知平時係咪無咁差,亦唔知會唔會因為前一晚打風先會搞成咁…
燒肉金城 石垣店
日本〒907-0022 Okinawa, Ishigaki, Okawa, 278
日本〒907-0022 Okinawa, Ishigaki, Okawa, 278
食完就過去搵十五番地入貨,呢間舖其實唔容易搵而且附近無位停車,王大少放低咗我去泊低架車先嚟搵我。留意附近係民居唔可以亂泊車架…
十五番地
地址: 15-6 Shineicho, Ishigaki, Okinawa 907-0014日本
雖然舖頭細細只有兩個雪櫃,但就有部車响舖入面,行過就非常吸晴。
地址: 15-6 Shineicho, Ishigaki, Okinawa 907-0014日本
雖然舖頭細細只有兩個雪櫃,但就有部車响舖入面,行過就非常吸晴。
唔好問我邊樣好食,因為樣樣都咁好食,值得推介比大家。行開行埋又唔介意幫我買嘅我會好感激…不過大前提係要放雪櫃,一定係要急凍先可以攞返香港,去超市買咗個保溫袋臨上機前先放入喼,返到香港仲係冰嘅。豬潤食用前一日放去雪櫃普通格(4度)解凍一晚就得,切開加少少黑胡椒更惹味,橫隔膜會放入焗爐烤香,煙肉/腸仔用嚟做早餐同意粉都試過…下次一定試埋其他嘢。
買完豬潤就要就去碼頭打聽下邊日會有船去波照間島,係呀…去波照間島呀!
知道應該會有船個心定好多,去到碼頭就順便買蜜糖,呢隻係民宿住客介紹我哋架,雖然話波照間生產但碼頭就有得買。呢隻蜜糖有獨特香味,好啱王大少用嚟飲凍齋啡,佢真係愛不釋手。佢飲到最後一樽見到佢果種慳住飲就知佢有幾鍾意呢隻蜜糖。
呢餐就係我哋嘅結婚週年大餐,加埋今日買嘅豬潤同民宿老板送嘅啤酒,有時簡單都可以好幸福。多謝安部先生及同事們嘅祝福,呢晚就算食杯麵都好開心。
知喇,你哋想知我哋食完椰子蟹有咩報告丫嘛…收到喇!
Part IV 就會睇到,嚟緊仲會去埋波照間島…
再戰石垣 27/9 - 5/10
西表島浮潛、夜釣、波照間島、石垣海釣、米原浮潛Maru 串燒店、はーりー椰子蟹、石垣屋、燒肉金城、十五番地、
一龍居酒屋、Papiru 人氣蛋糕店
西表島モンスーン民宿、Lulaliya民宿、Hotel WBF PORTO Ishigakijima、碼頭租車
石垣第一旅 ~ 行程簡介
30/5 Day 1:石垣機場 → 石垣碼頭 → Vanilla-Deli → 西表島モンスーン民宿
31/5 Day 2:西表島浮潛 ~ バラス島&鳩間島一日遊
1/6 Day 3:西表島浮潛 ~ バラス島半日遊
2/6 Day 4:島料理あちまゆん → Lulaliya民宿 → ひとし本店
3/6 Day 5:深潛、浮潛睇魔鬼魚半日遊 → ちねんや~新川店
4/6 Day 6:深潛溫泉海底半日遊 → 石垣牛ケバブ Kaboo → 山ちゃんの部屋
5/6 Day 7:向日葵花田 → 平久保平燈塔 → Seven Colors → 米原海灘 → 石垣屋
6/6 Day 8:石田屋 Ishidaya → ANA International Hotel → China Shadow
7-8/6 Day 9~10:海釣體驗半日遊 → JA ゆらてぃく市場 → 石垣牛と海鮮の店 てっぺん
🌻歡迎各位分享、讚好及訂閱【王家飯館】的網頁、Facebook、Instagram、YouTube
沒有留言:
發佈留言