石垣第一旅 ~ 西表島浮潛試玩報告

比起石垣我更喜歡西表島嘅海底世界

入住民宿第二日就跟民宿船長出海浮潛，呢個一日團會去バラス島(由珊瑚礁石形成的海上沙洲，僅有在退潮時才會出現的幻之島)＆鳩間島，西表幻之島面積唔大但好少人去，船長仲會一組組咁放低我哋再幫手响遠近距離影相，感覺真係好似留落响荒島一樣，加上當日天氣非常好，見到嘅水都係玻璃水，真係好似去咗馬爾代夫個海咁。



朝早9點由船長車我哋去碼頭等埋其他團友就上船，由於其他4位團友都係搭早船入西表島，所以响碼頭唔會等好耐，上到船船長會介紹今日嘅行程，先會去一個潛點跟住會上バラス島影完相就再去多一個浮潛點，呢個浮潛點嘅珊瑚好唔一樣，第一個潛點主要係睇啲細魚仔同色彩繽紛嘅珊瑚，仲幸運地還到兩隻海龜(第一日見到真係以為自己好彩，其實係船長了解海龜行蹤，呢兩日都見到同一隻海龜)，第二個潛點係睇一片片嘅珊瑚礁，浮潛都覺得好靚如果可以潛水就更加好喇，不過民宿無呢個服務而上網都有搵過不過就唔接受語不通人士，而且呢個地方我哋都係第一次嚟，探吓路先可以有藉口去第二次丫嘛!

由於4位團友都只係玩半日浮潛及扒獨木舟睇ピナイサーラの滝(瀑布)，所以下午就只得我哋兩條友包團入鳩間島。雖然我哋都知道呢個瀑布好出名仲好靚，但係需要有一定嘅體力先可應付得到，自問真係無咁嘅體魄扒完40分鐘獨木舟再健行30分鐘，睇完瀑布又再行20分鐘再扒40分鐘，所以只有放棄呢個景點。

上午玩完就送番4位團友上碼頭，响碼頭已經有職員接佢哋去下一個目的地，我哋就出發去鳩間島食午餐，搞笑嘅係我哋又攰又餓無影相就開餐喇，雖然只係飯糰、炸雞同烚蛋，但我哋都好滿意，總好過見到其他團體食嘅午餐係淋一堆汁嘅碟頭飯我更喜歡食飯糰，有一種家的感覺，簡單得嚟又好味。

食飽咗就開始1個半小時嘅自由活動，鳩間島有個燈塔同沙灘，不過由碼頭行過去都要一段時間，頭先都講咗我哋無咁嘅體力浮潛完再上山下海唔啱我哋，行咗一陣就反轉頭去碼頭附近嘅Cafe坐低飲杯凍咖啡，望住個海坐下飲下休息下仲自在。

Cafe仲有吊床可以訓，不過我哋梗係無試過啦，真係怕訓低咗唔知時間過呀!

由於我唔小心放錯SD咭入Gopro，好多海底影片都儲存唔到，不過就咁响水面睇都睇到珊瑚就知啲水有幾清。但係我哋都係唔甘心決定要再約船長去多次，第二次就只參加半日浮潛，仲請民宿職員幫忙安排午餐，咁就可以返到民宿沖埋涼舒舒服服慢慢食。

第二日再去啲水好無咁清，雖然天氣都係好只係前一晚落過雨水無咁清，有時嘅嘢真係整定，係要比多個藉口我哋再去多次。

總結：

船長好好人知道我哋第一日部機唔生性想影海龜都唔得，第二日再跟佢出海第一時間幫手搵海龜，佢搵到果陣仲高興過我哋。每次上水船長都會送上凍茶同黑糖，佢知道我鐘意呢隻黑糖第二日預備好滿滿一盒真係令人窩心。每次停船都唔係拋錨而係勾响早前預備好嘅浮波，有次見到停响無浮波嘅地方船長都係徒手潛水去綁定岩石，愛一個地方就會身體力行去盡力保護，呢點係值得欣賞。雖然船長唔係好聽得明英文，而我啲日文又得半桶水，但係我哋都可以用身體語言溝通得好好。

海入面有好多珊瑚礁，雖然有部份白化咗但都見到好大群色彩鮮艷嘅珊瑚，所以決定3個月後再來浮潛+潛水應該會睇到更多，因為我真係好鍾意呢個海。比起石垣島三次浮潛同兩次潛水都唔及得西表咁靚，如果行程可以的話真係要留响西表住番晚，咁就唔洗一早搭船入島又要玩足全日水上活動咁吃力。

第二日去幻之島時我哋無過去，只係船長帶住其他團友游過去，可能當日人比較多所以所有船都無泊埋島，每位客人都係自己游過去，我哋前一日已經影咗就無謂同人迫，响隻船附近浮咗陣就上船，聽到一啲好熟悉嘅語言好似係求救又唔似係嗌救命咁就跟住個方向望過去，見到有4、5個香港人攬住個水泡浮浮沉沉咁又好似唔夠氣游咁，真係好想問佢要唔要幫手，但係見佢哋無生命危險就再觀察下，原來佢哋幾個都用咗全面罩浮潛鏡，响呢度真係好想同大家講，全面罩只可以响無風無浪又淺水嘅地方用，出到海都係用番傳統果隻眼罩會好啲，因為全面罩係响某一個水平位會塞住唔比水入，即係連空氣都入唔到嘅時候人係會害怕起來，好似突然呼吸唔到咁，好多時都會除面罩抖氣但又會睇唔到嘢心唔慌就奇，因為我試過係咁個心慌到要即時上番水，所以唔熟水性又唔熟悉面罩運作嘅人士最好唔好响大海用面罩。

最後送上5分鐘西表魚樂無窮比大家

西表島Monsoon 西表島モンスーン
地址：〒907-1541 沖縄県八重山郡竹富町上原984-50

電話：0980-85-6019

バラス島＆鳩間島一日遊 ¥10,000 (連稅)/人 (包午餐)

バラス島＆鳩間島半日遊 ¥6,000 (連稅)/人

網頁：https://iriomote-monsoon.com/ (可網上預約住宿及活動)

再戰石垣 27/9 - 5/10 

西表島浮潛、夜釣、波照間島、石垣海釣、米原浮潛
Maru 串燒店、はーりー椰子蟹、石垣屋、燒肉金城、十五番地、
一龍居酒屋、Papiru 人氣蛋糕店
西表島モンスーン民宿、Lulaliya民宿、Hotel WBF PORTO Ishigakijima、碼頭租車

石垣第一旅 ~ 行程簡介
30/5 Day 1：石垣機場 → 石垣碼頭 → Vanilla-Deli → 西表島モンスーン民宿
31/5 Day 2：西表島浮潛 ~ バラス島＆鳩間島一日遊
1/6   Day 3：西表島浮潛 ~ バラス島半日遊
2/6   Day 4：島料理あちまゆん → Lulaliya民宿 → ひとし本店
3/6   Day 5：深潛、浮潛睇魔鬼魚半日遊 → ちねんや～新川店
4/6   Day 6：深潛溫泉海底半日遊 → 石垣牛ケバブ Kaboo →  山ちゃんの部屋
5/6   Day 7：向日葵花田 → 平久保平燈塔 → Seven Colors → 米原海灘 → 石垣屋
6/6   Day 8：石田屋 Ishidaya → ANA International Hotel → China Shadow
7-8/6 Day 9~10：海釣體驗半日遊 → JA ゆらてぃく市場 → 石垣牛と海鮮の店 てっぺん

🌻歡迎各位分享、讚好及訂閱【王家飯館】的網頁、Facebook、Instagram、YouTube