開箱Yohome 家の逸 全自動洗衣機
上次試過半自動洗衣機，今次就試吓全自動又係咪好用咗先。
打開盒見到個洗衣機都幾大個，可能係上一代可以折叠比人感覺機身細好多，打開洗衣桶見到入面放晒所有配件同電線，拎晒出嚟望吓洗衣桶總係覺得咁細到底係咪有7L，上一代係9L同這個比較感覺上好似大一倍咁。
[王家心底話] 開箱樂天網購買咗咩?(廚房篇)蒸水蛋好幫手/洗米濾網/指尖鉗/關孫六廚師刀
[王家心底話] 開箱樂天網購買咗咩?(廚房篇)蒸水蛋好幫手/洗米濾網/指尖鉗/關孫六廚師刀
今日同大家分享吓樂天網購買咗啲咩返嚟，先講一定係我好鍾意嘅廚房用品啦。
燕三条蛋汁濾網
呢個真係私心推介，王大少好鍾意食蒸水蛋，本身用緊嘅比較淺嘅隔油網過濾，但成日都响側邊漏出嚟又過得慢，搵咗好耐終於搵到個啱心水嘅濾網。
Butcher Cut JA和牛套餐 開箱報告
首輪試伏
講番啲牛扒先，以前去開Aeon買啲百幾二百蚊左右嘅牛扒間唔中吓食都唔錯，但裝修完之後換咗另一間就似乎無咩唔同只係價錢多咗大約三分一，而UNY嘅Dry Age係好靚，但又唔會富貴到個個星期都食囉。最後走上網睇下買開芝士果間嘅牛扒點(因為佢啲豬鞍唔錯㗎，下次介紹吓)，但都唔係好啱心水，最後就响Facebook嘅廣告見到Butcher Cut，價錢唔算貴但又未去到笑呵呵咁平，最優惠都算係套餐，見到都有唔少人留言問過幾錢、有無貨…大家都知呢啲留言係可以買嘅，所以我就向谷歌大神請教一下，點知竟然一個留言都搵唔到…無人講?咩料呀!
Butcher Cut嘅選擇唔多來來去去都係得果幾個套餐好似唔係好專門咁，不過呢個價錢可以食到和牛又係一個唔錯嘅選擇喎，之前都有介紹過大家响HKTV MALL用$198就買到200G和牛套餐真係大件又抵食(已經好耐無再見過呢個套餐出現喇)，如果呢間和牛有水準的話都咪話唔抵食。
CleanseBot 智能殺菌除蟎清潔機器人 試用報告
點樣除蟎呢?
首先要講講點解要選呢部機，留意番我唔係用買…係因為部機係用就嚟到期嘅里數換番嚟，當大家都要安坐家中無得飛嘅時候，計劃好嘅行程就要取消連換機票都可以慳番…就嚟到期嘅里數點算好?只可以上網睇下可以換到啲咩再作打算~
我只有14000里數到期，雖然用多啲里數可以換其他但都係無咩心水，响有限選擇之下只好搵啲有用途嘅用品，除蟎機械人都算係其中之一。用咗14530里數換番嚟嘅機械人到底好唔好用?上網換完只要兩個星期左右就送到上門，仲唔洗加任何費用。
Rasonic RSB-B1CV 迷你蒸煮盒 測試報告
Rasonic RSB-B1CV 迷你蒸煮盒
今次要講嘅係呢個單層嘅蒸煮盒，雖然有好多配件但我哋都無用過，因為只係打算放响公司用，所以唔洗咁多花考。
跟機有兩個碗，一個白陶瓷及一個不銹鋼，雖然白陶瓷果個先係預設嚟帶飯，但王大少比較喜歡用不銹鋼比較多，因為比較輕同唔容易打爛，仲有個細蒸碟可以將飯餸分開。
Ecoguard天然殺菌．除臭水製造器 測試報告
真係咁神奇?
買Ecoguard天然殺菌．除臭水製造器係因為想間屋除臭，因為有兩隻狗春天都會好濃狗味，而佢哋都係唔落街去大小二便嘅，所以平時都會用除臭用品，雖然寫到明係動物適用但都覺得味道好大，人都覺啲小毛孩咪好辛苦囉，不過見呢隻好似好天然所以好想試下。如果得嘅話屋企就可以買少好多消毒除臭化學品，咁樣對地球都好啲。其實無諗住寫呢個開箱文，因為懶得就懶(其實已經懶咗半年無寫BLOG喇)，不過最近多人搵消毒產品見到網上好多類似嘅產品，價錢只係呢隻韓國貨嘅1/4，仲要係意大利、加拿大、台灣…製造，朋友們都問我得唔得，其實我無用過其他果啲唔知係咪真係得，不過可以分享一下買呢部機之前就做過少少資料搜集知道次氯酸水係點做同點用，但簡單嚟講呢啲全部都係經電解嘅水，只要加唔同嘅物料去電解就會有唔同嘅效果，重點係响某些條件下加入物料後經過特殊電解先會有殺菌作用嘅次氯酸水(例如加入鹽)，詳情可睇番維基百科。
Yohome 便攜式折疊洗衣機 測試報告
真係幫到手?
嚟緊要同王大少去一個大旅行，呢個地方唔係我哋去開嘅日本咁方便，仲要23日真係唔係容易嘅事，所以都要有啲準備先得。同王大少商量過幾個問題要解決，其中一個係洗衫嘅問題，話晒都要去3個星期，出面唔換入面都要換啦。留意到果邊嘅酒店唔多又貴仲要唔可以煮飯食，住小屋係工具齊全但一般要成二千幾，如果有4個人上住先抵番條數，所以今次嘅行程多數都係住小型Guest House，可以煮食先可以有效控制成本但就多數都無洗衣機，所以就諗住買部嚟試吓得唔得。
未去之前先要試咗先，唔係帶到過去唔好用就煩喇。買之前都有搵過唔少資料，不過好多都無詳細用家分享，今次都係摸石過河試吓可唔可以，就算唔可以帶去旅行都可以留响屋企洗內衣褲，咁都唔會浪費。
之前買咗個洗衣蛋仲話可以唔洗用洗衣粉仲要輕到似隻滑鼠咁上下，試用之後發現咗個問題
DeLonghi KG49 全自動咖啡磨豆機 測試報告
王大少都有新玩具
話說有日王大少問我冰滴咖啡同佢飲開嘅凍咖啡有咩唔同，經過我一輪講解之後佢就知大係大分別，其實佢未問我之前我都有睇過幾款冰滴咖啡壼，只係價錢相差太遠又唔知好唔好用之餘佢係要用磨豆機嘅，咁咪即係又要買多舊嘢放响屋企囉…
其實磨豆機同咖啡壼都有同一個問題，就係價錢相差好遠，平嘅2-3百就有交易，但再上一級就要過千元，所以我一直都只睇唔買，直到王大少問起我先話佢知。佢轉咗飲齋啡之後攞返工飲果隻係即磨咖啡加冰，同冰滴咖啡味道好唔同，既然佢咁想試就買套平嘢嚟滿足下佢啦!
家庭用豆腐機測試報告
12分鐘就搞掂
王大少都幾鐘意食豆腐，但係好味嘅豆腐好難搵，現成買嘅靚豆腐存放期都好短，可以放耐啲嘅都有防腐劑，而且通通都唔係王大少想要嘅豆腐，佢話最好食嘅都係响日本，就算係細細嘅居酒屋啲冷奴都好有水準，所以我就上網搵下但係能夠搵到嘅資料唔多，呢個係响樂天見到嘅家用豆腐機，而且都只得三兩間綱網店有得賣仲要係唔做國外配送，咁啱會去名古屋旅行就膽粗粗問下呢間豆腐專門店可唔可以送去酒店代收，無諗過答案係可以…咁就梗係即刻訂啦。
匠本舖開箱報告
冬至食乜好?
同王大少商量好冬至會同老爺、奶奶打邊爐，都會一如以往用日式湯底，因為奶奶食得比較清，王大少又鐘意打完邊爐再食碗雜炊，日式湯底就最啱喇。
王大少要嘅呢碗雜炊，係要有新鮮蟹肉嘅配合先得，有時怕拆蟹肉麻煩試過用罐頭蟹肉但係王大少一食就試得出唔係果回事，正當煩緊冬至要出街市同一大堆好媽媽同好爸爸爭鮮就頭痛，仲要樣樣都貴過平時幾倍，平時多人食會買隻肉蟹要二百幾，花蟹同奄仔都要一百，冬至要幾多錢先買到呢?一路買一路心痛。
而家知道Facebook嘅廣告其實幾有用
無意中見到Facebook有呢個廣告有蟹送，又咁啱要準備冬至晩餐，但又考慮到已經無响香港買日本蟹好多年，因為價錢貴又唔係果個味道，最後只可以去開日本食到夠同買返嚟嚐吓咋。不過見佢係可刺身用而家買有價減，再加埋24號前訂可以減多$200仲有隻松葉蟹送，咁多樣嘢加埋都係$798，而且仲免運費…都係要再諗下先。
問咗王大少佢即刻回覆無問題，好奇怪呀!平時佢第一時間問價錢，再左問右問先會有答案，今次一句都無問，咁好啦為咗可以唔洗同人迫同買貴嘢就比次機會試吓佢啦。
呢個係一個雜錦海鮮豪華套餐，仲係人氣NO.1受歡迎貨品，原價$1,844而家只係$998，訂貨時加係優惠碼再減多$200。
我响18號訂就安排20號收貨，送貨果位哥哥仔係宅急便嘅員工，仲超有禮貌。好喇，好喇，開箱睇吓先。
入面有：
1. 刺身用特大去殼松葉蟹腳肉…約500g
2. 4L急凍熟松葉蟹肩腳…約680g
3. 刺身用北海道牡丹蝦…約250g
4. 北海道帶子刺身…9粒
5. 鯖魚醬油煮…約160g
6. 鯖魚味噌煮…約160g
7. 宮崎農村煙肉香腸(香蒜味)…約90g(4條)
8. 宮崎農村煙肉香腸…約90g(4條)
9. 豚肉白菜卷…約200g
10. 廣島蠔肉…約200g
11. (贈品)原隻松葉蟹…一隻
 |
| 呢個箱只係放咗一隻蟹…真有趣 |
唔好問我好唔好食，因為有部份進行解凍中，另一部份放咗去冷藏，今次只係開箱驗貨啫，試食報告要過幾日先會有初步試食結果。啲相咁濛係溫差唔係因為相機有問題，我係唔會為咗靚啲而影響食物質素。
點解咁快出post?收咗錢?攞咗著數?
以上皆不是，全部都係自己真金白銀買，只係收到貨覺得對辨，連贈品果隻松葉蟹都唔細隻，發現好嘢緊係早啲同大家分享啦，送蟹個優惠做到24號咋!一次過食唔晒唔緊要，可以冷藏一個月，咁就可以慢慢食啦! 打算用 4L急凍熟松葉蟹肩腳拆肉做雜炊，帶子同蠔就用嚟打邊爐，因為老爺、奶奶唔太食生嘢，咁刺身就留番同王大少二人世界先嘆。香腸可以做早餐，鯖魚就做晚餐，而白菜卷就比王大少做便當…呢個安排都唔錯丫。
事先聲明：無收過錢同著數，所以唔係賣廣告未試味唔知有無伏，如果味道好就大家一齊買到好嘢，如果伏就…哈哈!(咁先係JM嘛，齊上齊落齊中伏)
溫馨提示：訂貨時記得入個優碼【MCM200)就可以減多$200。
🌻喜歡請比👍Like👍（多謝咗先，我會繼續💪）
🌻歡迎各位分享、讚好及追蹤【王家飯館】的網頁、Facebook、Instagram、YouTube
訂閱：
文章 (Atom)