12分鐘就搞掂
王大少都幾鐘意食豆腐，但係好味嘅豆腐好難搵，現成買嘅靚豆腐存放期都好短，可以放耐啲嘅都有防腐劑，而且通通都唔係王大少想要嘅豆腐，佢話最好食嘅都係响日本，就算係細細嘅居酒屋啲冷奴都好有水準，所以我就上網搵下但係能夠搵到嘅資料唔多，呢個係响樂天見到嘅家用豆腐機，而且都只得三兩間綱網店有得賣仲要係唔做國外配送，咁啱會去名古屋旅行就膽粗粗問下呢間豆腐專門店可唔可以送去酒店代收，無諗過答案係可以…咁就梗係即刻訂啦。
雖然第一晚、第八同第九晚都係住响同一間酒店，但都選咗第一日落機就收貨，都係因為想收到之後盡快試機，如果真係咁唔好彩有咩問題都仲有時間去解決。
响日本做咗個簡單試機已經急住同大家分享，知道大家都對呢部豆腐機好有興趣，所以返到嚟第一間就再認真啲再試機，希望可以同大家分享一個比較真實嘅報告。
今次除咗訂機之外訂咗兩片取り出しシート ，我叫佢做【容易取出咭片】同獨立包裝鹽鹵方便可以响日本即試。豆漿就响錦市場專賣豆漿同豆制品店舖買。
因為只有1L裝豆漿，而我哋又只會試一次，所以就一次過整晒，只係要落兩包鹽鹵就可以，落咗之後要打8字咁攪拌，要响結塊前拌勻，快手又唔可以太大力，所以第一次整嘅時候有好多泡响面又無工具整走，算啦試機啫…自我安慰高手。
攪好就開機測試，只係得一個按鈕，按著就會見到【調理中】的燈亮著，等待過程中係唔會見到有咩動靜嘅，但一定唔可以郁到部機，只係响大既10分鐘左右有好香嘅豆味，大約12分鐘調理中燈號熄滅就代表完成。
第一次試食只有醬油搭配，不過都已經好好味，1L嘅豆漿可以做到3盒市面上盒裝豆腐，點都唔會食得晒，我問咗王大少3次佢都話等陣會再食唔比我掉，最後都係食剩1/3，都算唔錯。
第二次係返到香港再試，不過先要配個火牛先得，個火牛成個鞋盒咁大，以前就係因為火牛太大先唔用水貨小家電，今次為咗部豆腐機就投降喇，但係話說回來，以後買水貨機都唔再怕喇。如果無諗住放部鞋盒咁大嘅火牛响屋企就唔洗諗，但如果唔介意又或者已經有咁大隻火牛的話都可以試下用呢部機做豆腐。
今次响AEON入面嘅金久買咗豆漿，同响日本試機一樣，試過响部機入面攪拌同先用碗攪拌好再過篩，後者隔咗泡會好啲，豆腐做出嚟滑啲。不過金久豆漿未夠香，下次可能要試下自己磨。
心得：
- 訂機時最好訂埋【容易取出咭片】，唔洗用刀都可以成件豆腐拎起跣落砧板就可以切。
- 碎咗嘅豆腐都唔好嘥，買多個豆腐模就可以做硬豆腐(聽講上海街有得賣，得閒去睇下先)
- 買埋豆腐隔水盒，食唔晒都可以放雪櫃
熱食：
少少蔥花、日本芥辣同薑茸，再加少許魚生豉油
淋上鰹魚汁再灑上鰹魚花
凍食：
少少蔥花，加入日式芝麻醬
淋上柚子醋再灑上鰹魚花
其實之前都有搵過唔同嘅豆腐機代理，不過好多都唔肯送酒店，而樂天同亞馬遜都只係做國內配送，如果想買可以搵代購又或者去開日本就安排送貨，不過一定要Check清楚酒店會否代收包裹。
購買資訊：
網頁：http://www.fkco.jp/shop/
電郵：info@fkco.jp
用電郵都係用有限度日文再加Google translate先搞得掂，文法就應該唔太啱，不過大家總算溝通到。
溝通好會有一條link比你購買，平時只接受會員網頁訂購，買好咗會有電郵回覆。
商品名：とうふすていしょんR ＜家庭用豆腐製造器＞ 取り出しシート（2枚組）付(+486円)
價錢：¥22,086
商品名：にがり 5cc×20 （鹽滷）
價錢：¥432
因為呢個產品係內消費稅，唔洗再比8%，但亦都無得退稅。
運費：¥1,224
【運費因應酒店地店與店鋪拒離】
{提提你：記得購買人名稱要與酒店訂房人姓名相同，否則收唔到貨。}
🌻喜歡請比👍Like👍（多謝咗先，我會繼續💪）
🌻歡迎各位分享、讚好及追蹤【王家飯館】的網頁、Facebook、Instagram、YouTube
沒有留言:
發佈留言