名古屋亂食、亂買十天自駕之旅 ~~ 第一天

Day 1 ~ 香港 ~名古屋

日期：2019-01-17

早機去機場食早餐是常識吧!我哋都一樣，不過唔知係咪太耐無去機場，連翠華無咗都唔知(禁區內)，仲諗住帶個奶油豬上機食，周圍嘅食市都唔係想食，Lounge又大排長龍，見到McCafe唔多人就是但食啦，可能係太耐無食，又幾好喎。佢新出咗杯玫瑰Latte個樣唔錯，個味道亦唔差，同H字頭果間有得比(性價比一定嬴晒)，只係咖啡用咗較深烘焙嘅豆，有微微濃味但飲得過。

今次搭CX536朝早10:25起飛，去到名古屋中部機場要3.5小時，到埗係日本時間3點左右，平時上機會選水果餐，但今次呢個時間就唔好喇，因為一落機要去攞車再出市區都5點，唔想食都要張就下，點知今次有驚喜喎!

今次我揀咗海鮮意粉，而王大少就食日式雞飯，兩個都唔錯但我都偏愛意粉多啲。而冷盤係冷麵味道都唔錯，配杯啤酒就一流，不過王大少就唔飲得，一落機就要揸車無得飲。甜品就係士多啤梨雪糕，呢個唔洗多講啦！都係我同王大少鍾意嘅口味。

今次個行程只有幾個地方係最想有雪景，去之前就已經好擔心，因為今年真係好熱，一啲都唔似冬天嚟過咁，飛機就到時就望下見唔見到雪，真係預料之中，只係見到一大遍無雪嘅山頭…唉！

租車係搵Toyota Rent a Car租咗架P1小型車，都有考慮過架車輕怕有橫風，但因為夠慳油而且得兩個人，最後都係要咗架細車，不過如果再去呢類長途行程會考慮租架大少少，因為响高速公路遇到橫風都幾危險。

租車只需要响網頁輸入資料就可以去到先比錢，租金10日總數¥54,540(包括：稅¥5184+免責補償費用¥9,720)，但最後因為要去白川鄉要用雪軚要再加¥19,440，所以最總數：¥88,884(HK$6577.41)，除返開10日每人都係$328.87。今次都係有用ETC咭，一來方便唔洗成日搵現金比錢同找續，二來用咭係會平啲嘅，實際平幾多就計唔到，因為唔係每條高速公路都有得減，但係有啲4千幾就只收3千幾，因為ETC發聲响司機位同好細聲，唔係次次都聽得清楚。

攞到車第一站先去常滑市Aeon Mall (地址：愛知県常滑市りんくう町２丁目２０−３，電話：+81 569-35-7500)，因為我要去JINS (Aeon Mall 2F) 配眼鏡，上次去北海道已經想配副漸進鏡片，不過呢種特別鏡片要訂做10日，最後只可以放棄。今次要一到埗就即配時間應該可以配合到。買夠¥5000仲可以响商場退稅。

今次要配一副有漸進同防藍光嘅鏡片，開頭都有啲擔心會溝通唔嚟，咁啱今次遇到識講普通話嘅台灣男孩，成件事變得輕鬆好多，仲話我知7日就有得攞，咁我就放心晒喇!跟住就去超市買生果，買咗啲士多啤梨、提子、柿同蕃茄，係呀蕃茄其實係水果嚟架。見到佢咁靚咁平真係忍唔到手要買番盒，如果我個廚房就响附近幾好，有咁多新鮮蔬果。如果唔係要配眼鏡真係唔太建議嚟呢個商場，只係夠大同停車場唔洗錢，無啱嘅目標可以唔洗嚟都得。

一早就訂好咗今晚食雞泡魚宴，其實王大少唔食魚嘅，但係上次去大阪黑門市場佢話想試下，可能係睇過杜如風介紹過，但係我諗咗一陣就話下次先啦，結果今次行程就加入呢間專門店，但去之前王大少終於忍唔住問係咪只係得雞泡魚咋，係呀!專門店嘛。原來上次佢只係諗住食少少雞泡魚生試下就算，點知我咁認真搵咗間專門店嚟整蠱佢…

呢間係位於名古屋市中心嘅雞泡魚專門店—玄品(想知食後感請按我)，王大少都唔相信自己會食魚，訂咗醍醐套餐入面包括有炸物、火鍋、刺身、漬物、雜炊同甜品共六品，原本諗住番酒店前去名鐵地庫買蛋糕做宵夜，但係食完呢個餐已經好飽。

由玄品揸車返酒店大約15分鐘就到，今次住VIA INN Nagoya Ekimae Tsubakicho (想知酒店體驗請按我)，酒店响名鐵百貨附近(約10分鐘腳程)，樓下仲有好多食市，去Big Camera同千里馬藥房都近。房間乾淨電視超大，對比房間大少就有過大感覺。

搞好Check-in手續就即問包裹(家用豆腐機)收到未，日本人做嘢果然無令人失望，話咗幾時就幾時，臨上機前兩日仲比多個E-mail通知我會幾時寄出，大約送到酒店時間，仲有條Link可以跟蹤郵件，咁嘅服務真係無話可說。(有關家用豆腐機測試報告請按我)

名古屋亂食、亂買十天自駕之旅 ~~ 第一天

名古屋亂食、亂買十天自駕之旅 ~~ 第二天
名古屋亂食、亂買十天自駕之旅 ~~ 第三天
名古屋亂食、亂買十天自駕之旅 ~~ 第四天
名古屋亂食、亂買十天自駕之旅 ~~ 第五天
名古屋亂食、亂買十天自駕之旅 ~~ 第六天
名古屋亂食、亂買十天自駕之旅 ~~ 第七天
名古屋亂食、亂買十天自駕之旅 ~~  第八天
名古屋亂食、亂買十天自駕之旅 ~~  第九、十天

Haifu はいふう溫泉酒店 【飲食篇】
Haifu はいふう溫泉酒店 【房間、環境篇】
和菓子工作坊初體驗 ~ 生八つ橋
八坂圓堂
かつくら名代豬扒~~試食報告
Hotel Gracery Kyoto Sanjo 試住報告
越前蟹の坊
醍庵試食報告
箔一~東山店
VELICA AVEDA 金沢剪髮體驗
ざくろ居酒居
Hotel Wing International Premium Kanazawa Ekimae (Wing 國際酒店)住宿體驗
飛騨牛食べ処 てんから
玄品雞泡魚專門店
VIA INN Nagoya Ekimae Tsubakicho 名古屋站前樁町住宿體驗
名花之里
漁太郎試食報告

🌻喜歡請比👍Like👍（多謝咗先，我會繼續💪）

🌻歡迎各位分享、讚好及追蹤【王家飯館】的網頁、Facebook、Instagram、YouTube