名古屋亂食、亂買十天自駕之旅 ~~ 第四天

Day 4：金澤 → 京都

日期：2019-01-20


响附近Starbucks食完早餐就返酒店執埋行李就要出發，因為要揸一個鐘頭車去福井縣嘅越前食蟹。為咗呢一餐都做咗唔少功課，不過資料真係唔多，可能地點比較偏遠令人卻步，的而且確係可以去其他地方都可以食到越前蟹，只係可能價錢會貴少少，但係難得嚟到就算遠都想食到正宗。

前一日响金澤食過加能蟹已經覺得好好味，對越前蟹就更加期待。今次揀咗一間傳統越前蟹店係因為唔想有任何差池令我錯失美味，呢間舖出名係因為佢做溫泉旅館一泊兩食，好多人都會因為呢餐蟹宴而訂房，當然溫泉景真係好靚，但大部份人都會大讚個晚餐。之後就响附近開咗間食蟹專門店同海鮮專賣店，以我分析大家都係賣同一樣嘢，點解會有好食同唔好食嘅分別，好多時關鍵都係買手，呢間旅館有多年入貨經驗先會得到客人欣賞。基於以上原因我就揀咗佢。本來都打算住番晚，不過已經有心儀溫泉酒店安排咗，亦唔想晚晚換酒店咁辛苦，所以最後決定只係食個午餐就算。

早個半月訂位都怕佢無位，因為佢真係好爆，不過機票未搞掂就咩都唔敢訂，一收到機票確認就第一時間send email去問，唔好問我點寫都係用Google翻譯，文法就應該唔啱但睇得佢明又訂到位我唔介意比人笑吓，況且佢哋都知道外國人都唔會刁難你。

同日已經收到回覆話我要嘅時段無位，如果要食就要訂11點果轉，二話不說就更係要啦。王大少都話早少少出門口都無所謂，可能佢見我咁想食唔敢say no…哈哈。

睇過越前蟹の坊嘅網頁，已經諗好咗要食啲咩，只係隻蟹要幾重就一直揸唔定主意，因為相差100g個價錢都差好遠，雖然今年蟹價比上年平咗不過都係決定唔到，大家可能以為王大少唔捨得，其實今次係我。佢仲叫我唔好諗咁多要大果隻就得，只係我要到坐低果刻先有最後答案。

由金澤至福井一直都陰天，十點半就到達餐廳不過就開始落雨，餐廳未開而附近亦無地方好行，只可以响車度等，連餐廳好出名嘅外牆大蟹都無影到。見到有個似來自香港嘅男人响餐廳門口避雨，呢度交通咁唔方便又無揸車都要嚟食，內心多咗份期待。(越前蟹の坊試食報告及價錢請按我)

食飽之後又係一場長途賽，由越前蟹の坊揸車去京都要三個幾鐘真係一個挑戰，食飽咗就更加辛苦，中途停咗好幾個休息站，只有王大少一個負責揸車又真係好慘，我能能做嘅就係不停幫王大少補充咖啡因先有精神揸落京都。

臨近天黑先到酒店附近，不過兜嚟兜去都搵唔到酒店入口，最後仲揸咗入行人專用區去先去到酒店門口，又唔知酒店附屬停車場响邊，其實當時真係好徬徨，最後由我入去問酒店職員先有張地圖帶領我哋搵個停車場，由行人專用區揸返出大路又係一個挑戰，我哋真係唔係有心揸入行人專用區，只係跟住個GPS行，但又無話我哋知呢個時候唔可以行車，真係好抱歉。如果下次大家有機會會揸車去呢間酒店的話，就要早少少問酒店攞定停車場地圖(合約停車場可能會有改動，唔想放張圖出嚟誤導大家)，計劃好路線先得。

今次住係比較新嘅North Tower，房間有WIFI供應及地方乾淨，附近有好多餐廳同大型購物中心，如果唔揸車都好方便。

房內設備有風筒、毛巾、迷你雪櫃、牙刷、牙膏、梳、化妝棉、剃鬚刀及拖鞋，而洗頭水、護髮素、沖涼液及洗手液都有供應，房間仲放兩枝水可以隨便飲用。最特別係有兩包浴鹽，每日一包啱啱好，最啱係行到攰夜晚返去浸吓。其實應該每日都會有補充，住兩晚習慣性唔需要執房，不過佢哋都會掛一大袋毛巾、牙刷、樽裝水…等等日用品响門口。

洗手盤响房門附近，同洗手間係份開嘅，鍾意個浴室係澡堂咁嘅設計，地方夠大唔係一般膠囊合成咁，沖起嚟都好舒服，水力夠猛又夠熱，玩到攰行到腳軟浸個熱水浴都係唔錯嘅選擇。(詳細試住報告請按我)

放低行李安頓好就要搵嘢食喇，今日因為誤點搞到咁晏先去食飯，好在無訂餐廳咁就唔洗同時間競爭，打算行出去見到咩想食就食，最後都係去咗王大少鐘意嘅炸豬扒。

其實呢間係連鎖店，食物質素同服務都會有定水準，為咗留低旅遊記憶就算所有濕碎事我都會想記低方便下次再有個參考。

三元豬扒定食 ¥2200+稅 (HK$163+稅)
椰菜絲同白飯可以無限添加，唔似一般店舖要問先有，店員會留意你嘅需要問你仲要唔要，配嘅醬汁都係大同小異而味道唔差，炸豬扒肉味香濃入口鬆軟唔黐牙，以呢個質素呢個價錢係唔錯。仲有個新發現係王大少終於唔洗我再幫佢磨芝麻，可能係用得多屋企個磨，而家唔只唔會跳芝麻仲好成功，佢終於大個仔喇，明白到【要食就要出力】呢個道理。(詳細試食報告請按我)

名古屋亂食、亂買十天自駕之旅 ~~ 第一天

名古屋亂食、亂買十天自駕之旅 ~~ 第二天
名古屋亂食、亂買十天自駕之旅 ~~ 第三天
名古屋亂食、亂買十天自駕之旅 ~~ 第四天
名古屋亂食、亂買十天自駕之旅 ~~ 第五天
名古屋亂食、亂買十天自駕之旅 ~~ 第六天
名古屋亂食、亂買十天自駕之旅 ~~ 第七天
名古屋亂食、亂買十天自駕之旅 ~~  第八天
名古屋亂食、亂買十天自駕之旅 ~~  第九、十天

Haifu はいふう溫泉酒店 【飲食篇】
Haifu はいふう溫泉酒店 【房間、環境篇】
和菓子工作坊初體驗 ~ 生八つ橋
八坂圓堂
かつくら名代豬扒~~試食報告
Hotel Gracery Kyoto Sanjo 試住報告
越前蟹の坊
醍庵試食報告
箔一~東山店
VELICA AVEDA 金沢剪髮體驗
ざくろ居酒居
Hotel Wing International Premium Kanazawa Ekimae (Wing 國際酒店)住宿體驗
飛騨牛食べ処 てんから
玄品雞泡魚專門店
VIA INN Nagoya Ekimae Tsubakicho 名古屋站前樁町住宿體驗
名花之里
漁太郎試食報告

🌻喜歡請比👍Like👍（多謝咗先，我會繼續💪）

🌻歡迎各位分享、讚好及追蹤【王家飯館】的網頁、Facebook、Instagram、YouTube google.com, pub-3073176370794589, DIRECT, f08c47fec0942fa0