名古屋亂食、亂買十天自駕之旅 ~~ 第六天

Day 6：京都 → 三重縣

日期：2019-01-22

响酒店Check out完就要趕住去清水寺，要咁早出門口都係同一個原因，就係怕晏咗會多人，到時真係咩心情都無。

無錯，早起才可影到無人景致，只係天氣不似預期，但都無損心情。

行到中殿見到有個隨求堂，只要比 ¥100就可以入內走走，除好鞋後仲要將相機、手機放好，因為入面好黑係唔可以影相亦唔會影到相，快快手將相機用外套包好就入去，沿途有一串佛珠一路帶領，開頭真係會好心慌，因為申手不見五指係令人好無安全感，但再行一段路就覺得內心出奇平靜，只要手握佛珠行就會見到一點光，到時記得要許願。

泊車時仲有幾十個車位，但到離開時已經有數十車等候車位，停車場是免費的，如要自駕就要早點到。

係時候要起程，因為要去三重縣要三個鐘先到，但係我哋又想走一轉伊勢神宮順便食個午餐仲可以休息一下，但事情往往有意外，當車剛上公路就開始塞車，唔夠二十公里路程最後塞咗4個鐘先有出路，一見有休息站就即刻入去，因為已經餓咗好耐仲要內急，齊齊去完洗手間就要搵電話亭，因為約咗三點到溫泉酒店，雖然比晒錢但酒店都有規矩如果唔見人係唔會安排晚餐，今次溫泉酒店係响個島上面，要入住係要乘搭酒店專船先可以，過咗酒店預備時間就真係無啖好食。好在呢位酒店員工嘅英文非常好，佢完全明白我哋要求，仲叫我哋放心佢會安排晚餐，咁就放心好多，因為呢間酒店除咗有私人溫泉之外仲係好多日本人都推佢哋嘅晚餐好正，咁我哋又點捨得放過呢!搞掂咗今晚果餐係時候解決而家個肚，入到去已經唔係考慮食咩好，係睇下有咩唔洗等又飽肚就算，食熱食嘅地方已經無位又怕要等好耐，就去咗出面嘅車仔檔睇下有咩食，王大少要咗隻熱狗我就要咗個八爪魚丸，天氣凍食熱嘢點都好過食凍三文治同餅乾。

 只係過條隧道都已經塞咗兩個鐘

 另一邊仲有排塞，好在我哋係經伊勢去三重先唔洗咁慘。

因為有唔少人同我哋一樣，成個休息站都滿車，我哋買完只可以上車食。食完又要趕路，因為呢4個鐘只係行咗三份一路段，亦唔知嚟緊會唔會再塞，如果唔塞最快去到都要5點，所以唔敢留得耐。
我哋已經趕住入三重，但有啲嘢叫禍不單行，响呢個咁急嘅時候我哋竟然行錯路，不過又難怪會入錯路口，搞到入咗條山路，條路又多彎又窄真係好驚險，偏偏趕時間就行錯路。

不過都有得著，就係睇到山上美景。落山時已經天黑，真係又驚又怕。

名古屋之旅重點旅館

每次冬天去日本一定會選一間溫泉酒店住兩晚，一晚好似唔夠盡興，兩晚就可以令身心完全放鬆，咁先係旅行丫嘛!可能有人會唔認同點解要用咁多錢，但係呢個係我同王大少嘅旅行喜好，縱使成個旅程都唔悠閒，但到最後都會選擇放空兩天，等身心得到真正休息，【去旅行、去到盡】從來都唔係我哋杯茶。

我哋選擇溫泉酒店有三大原則：
1.要有私人溫泉(王大少無咩所謂，但我始終唔習慣赤裸裸比人望，就算人哋無望但個心都會唔自在)
2.酒店食物要好味(以往經驗話我知唔可以只選風景、地點同環境，有好多溫泉酒店都係一泊兩食，如果唔好食就慘慘豬，會直接破壞心情)
3.私人溫泉要露天亦唔可以太細(如果响室內的話同浸浴缸有咩分別?太細的話又唔可以一齊浸，一齊浸住望吓星空、大海、樹林、雪景都係好正嘅享受)

差唔多六點先去到酒店碼頭，要先在停車場入口專用電話致電酒店才可以開啟停車場入，泊好車就搬行李過碼頭等船，成隻船只係得我哋兩個，因為去得溫泉酒店都想玩到盡，邊會想天黑先到丫。船程都只係10分鐘左右，酒店碼頭已經同兩位員工等我哋，入到酒店個心先定啲咋。坐定定飲啖茶食件餅就已經搞好入住手續，仲介紹埋酒店內設施，傳統嘅溫泉酒店嘅服務就係咁細心同窩心。

酒店員工話我哋知原來係公路反咗架貨櫃車，所以塞到呀媽都唔認得，仲安排我哋上房休息一下7點就可以食飯。

Haifu はいふう溫泉酒店嘅膳食有好多好評，所以我哋都非常期待，換過件衫就去食飯。

晚餐(第一晚)

一入門口就見到好新鮮嘅海鮮，首先要我哋揀兩款海鮮之後就安排我哋坐位，我哋雖然唔係被安排望海前排位置，但後排都可以望海，而且仲係包廂，成個空間都好似只係我我哋兩個咁，氣氛唔錯。

枱面有張蠔三食餐單每款都係千幾，嚟到三重縣呢個漁港當然要試吓。揀好咗加一個前菜同餐酒就開始等待我哋嘅晚餐，雖然已經有杯開胃酒，但都會想同王大少飲番杯，响市區好多時都會因為要揸車要放棄，齊齊飲總比獨飲暢快。

前菜上枱第一個感覺係好睇唔好食，通常响日本餐廳都會遇到呢種事情，但今次唔一樣，正如網民所講，呢間溫泉旅館係睇得又食得。

炸太平洋鱸魚、海鮮沙律、蔬菜配芥辣

炸太平洋鱸魚味道鮮甜，新鮮就係咁，只係加少少海鹽就已經好好味。海鮮沙律放响沙律菜上面一齊食，方便又好味。一條唔知係咩菜炸咗再配芥辣汁好夾，條菜香口得嚟亦都唔乾。

伊勢龍蝦刺身拼盤

除咗前面兩款白魚係入場時自已選擇，當然我唔知自己揀咗啲咩，只係望見好似好好味又順眼，王大少怕腥我唔敢試外型比較奇怪嘅魚，其實只要新鮮，就算係白肉比較淡都會好好味。菊花下面係龍蝦肉，一件赤身一件拖羅再加上一個貝類。

日本芥辣鮮磨係最好味，呢度仲可以比你試下自己磨，以往都係買返屋企由我磨，今次就比王大少親手試下。

最後一道甜品係加泰羅尼亞焦糖奶凍配水果，味道甜了點不過都係日本甜食嘅範本，似係法式焦糖燉蛋咁，只係焦糖唔係脆身。


食飽飽就漫步返酒店，經過舟車勞頓最好係浸番個溫泉，但係飲咗酒又食飽咗就要等一陣先可以浸，就坐响露台吹吓風望下星星，好好放空一下。【詳情請參閱Haifu溫泉酒店飲食篇】

終於可以細心睇下房間係點樣，呢間酒店每個房間都有海景私人溫泉，除咗可以响房浸之外仲可以去酒店公共溫泉，酒店連同福壽莊共同溫泉，所以可以去嘅溫泉有好幾個，而且人唔多環境又靚(可以上網睇下)。由酒店行過去都唔洗10分鐘，而且有蓋落雨、落雪都唔怕。

放大張圖可以睇到好多星星

房間向東可以睇到日出，夜晚仲可以望到好多星星。每次浸浴都好療癒。

房間兩張單人床似兩張隻人床咁大

除有加濕器同一部少少電視機之外仲有個好大嘅衣櫃，仲有兩套浴衣可以比你著住响酒店四圍走

官網無寫呢款係幾大，而搵到同款嘅就話有130CM

房間入面無浴室，只可以响露台沖涼，老實講咁咁凍嘅天氣露天沖涼真係有啲凍同需要一定嘅勇氣

一睇就知王大少有幾嘆

想知酒店詳細資料可以參考以下連結

名古屋亂食、亂買十天自駕之旅 ~~ 第一天

名古屋亂食、亂買十天自駕之旅 ~~ 第二天
名古屋亂食、亂買十天自駕之旅 ~~ 第三天
名古屋亂食、亂買十天自駕之旅 ~~ 第四天
名古屋亂食、亂買十天自駕之旅 ~~ 第五天
名古屋亂食、亂買十天自駕之旅 ~~ 第六天
名古屋亂食、亂買十天自駕之旅 ~~ 第七天
名古屋亂食、亂買十天自駕之旅 ~~  第八天
名古屋亂食、亂買十天自駕之旅 ~~  第九、十天

Haifu はいふう溫泉酒店 【飲食篇】
Haifu はいふう溫泉酒店 【房間、環境篇】
和菓子工作坊初體驗 ~ 生八つ橋
八坂圓堂
かつくら名代豬扒~~試食報告
Hotel Gracery Kyoto Sanjo 試住報告
越前蟹の坊
醍庵試食報告
箔一~東山店
VELICA AVEDA 金沢剪髮體驗
ざくろ居酒居
Hotel Wing International Premium Kanazawa Ekimae (Wing 國際酒店)住宿體驗
飛騨牛食べ処 てんから
玄品雞泡魚專門店
VIA INN Nagoya Ekimae Tsubakicho 名古屋站前樁町住宿體驗
名花之里
漁太郎試食報告

🌻喜歡請比👍Like👍（多謝咗先，我會繼續💪）

🌻歡迎各位分享、讚好及追蹤【王家飯館】的網頁、Facebook、Instagram、YouTube google.com, pub-3073176370794589, DIRECT, f08c47fec0942fa0