Day 8:三重縣 → 名古屋
日期:2019-01-24悠閒食個早餐就要離開呢個咁舒服嘅地方,今朝王大少無浸完溫泉先食早餐,我當然心知點解啦。當食完早餐就係執行李嘅時候,如果佢唔搵啲嘢做我就會要佢幫手,佢寧願浸住溫泉睇我執行李都係一種享受,我都情願自己執會快好多,總好過多個每事問嘅隊友。
洋式早餐(第三日)
食埋呢個早餐再上房浸多次(只係王大少,因為我要執嘢)就要離開,呢兩日真係好舒服。响天寒地凍嘅時候可以望住個海/星空浸溫泉真係一個享受,唔怪得王大少成日都話要去日本啦。今日要食嘅早餐係洋式,我估計都係腸仔蛋呢類,最多都係多個奄列,加多塊多士唔食飯都可以。
一睇見呢個陣容就知可以有幾飽,真係嚇咗一跳。
士多啤梨乳酪、什菜沙律、水果 |
煙肉腸仔 |
炒蛋配茄汁 |
粟米忌廉湯 |
原本今日安排去真珠之里,但尋日已經去過今日就可以去返之前無去到嘅伊勢神宮再,食埋個晏之後再去名花之里就可以輕鬆啲、玩耐啲。
到咗伊勢神宮附近就要搵停車場,唔好諗住跟GPS行,因為伊勢神宮附近係行人專用區唔可以入。有好多停車場都係由大嬸管理,只要泊好車比錢大嬸就可以攞到張票,放番响擋風玻璃就可以。
過咗橋第一間見到就係赤福,雖然唔肚餓但就好凍,入去坐低飲杯熱茶食件名物先再行。
現場食同盒裝真係有分別,現場食係軟滑好多 |
呢個爐非常暖,响咁凍嘅天氣用火爐伴手真係好暖 |
赤福除咗室內仲可以坐室外,望住條河嘆茶確寫意,不過經常滿坐及比較冷 |
因為今日天氣凍咗好多,我哋只係去行到去回收御守嘅地方放低再行多陣就出返去步行街食飯,行咗一陣都決定唔到食咩,最後揀咗間合眼緣又係食松板牛嘅店舖就入咗去,後嚟先知呢間舖都幾有啲名氣。
松板牛定食 50g ¥2950 |
松板牛丼 70g ¥3100 |
地址:〒516-0024 県 市宇治今在家町60 二光堂
電話:050-3463-2627
網址:https://r.gnavi.co.jp/n221700/
*全店約有70個位
*可以收咭
牛扒大約5成熟而且牛味十足入口即溶,松板牛即係松板牛,呢個價錢食到呢個份量其實唔貴,入番名古屋用呢個價錢就只夠食半碗,有需要的話可以問佢攞英文餐牌。
食飽飯响步行街行咗陣就攞車走,想早少少去名花之里行下花園再早少少去排隊等著燈。名花之里(なばなの里)是日本最大型燈飾展,有條星光隧道可以影相打卡。每年十月到翌年5月開放燈飾,平時就只有花展。
值得朝聖嘅地方
名花之里(なばなの里)是日本最大型燈飾展,有條星光隧道可以影相打卡。每年十月到翌年5月開放燈飾,平時就只有花展。
園外有個好大嘅免費停車場,入場費¥4600 (連稅) HK$350【平均每人¥2300(HK$175)】,每張入場券包括兩張¥500代用券,可以响園內使用,包括响車仔檔買嘢食同玩機動設施,但我哋就用嚟入溫室參觀。
好難先遇到呢幾棵梅花係有啲花嘅 |
一月份仲係凍好多花都無開,見到好多花田都只係得幼苗,玫瑰園同某啲主題花園要夏天先會開放,等我哋仲早啲入去諗住有花睇下,原來呢段時間係育苗,行咗陣都係無咩嘢睇就用代用券入去溫室睇下。溫室入場費要¥1000,所以啱啱好用晒啲代用券。
呢個係入門口嘅打咭位 |
可以試下用低炒避開人羣 |
星光隧道全長200公尺,但係行落唔覺得咁大,可能係人太多嘅關係,我已經係平人嚟但係都超多人,好辛苦先可以避開人羣影下相,要影張沒有人嘅相真係超難,其實唔趕時間的話可以晏啲先去,不過就會錯過咗開燈前嘅倒數氣氛,日本人真係好投入。
行完第一條隧道出口會見到一個超大LED燈光表演,每場大約7分鐘左右,見到有富士山做主題嘅四季轉換,表演住前面仲有好多支LED燈花園,睇落好浪漫。
這個水上LED燈光裝置是日本最大規模的光之大河。 |
離開名花之里就要返酒店,今次都係住第一晚嘅VIA INN Nagoya Ekimae Tsubakicho 名古屋站前樁町住宿體驗,第一晚已經見到酒店轉角下一條街有幾間立食店,見到氣氛好熱鬧同好似好好味咁,就安排今日玩完之後攰就買上房食,唔攰就搵間入去試下,不過王大少唔係咁想,因為佢怕人多又覺得唔識日文唔知點叫嘢食,但係行到見到有間濱燒、串燒同炸雞店,啲香味令你好想入去試下,最後就入咗串燒店,炸雞好似單一咗啲,濱燒聽日都會去今晚就唔試喇。
地方都係好迫但氣氛好好,仲有英文餐牌同大量相片提供,唔識字都唔怕叫唔到嘢食啦。
呢個豚肉串燒三味值得推介 |
其實當地人會食好耐,佢哋大多數都會叫咗個沙律或者前菜之後再逐串叫,飲下食下咁都幾Chill 。我哋就一次過叫到成枱都係,因為我哋都肚餓喇,食完仲要返去沖涼休息,為明天旅程作個準備。後嚟先知呢間大黑串燒有好多分店,叫到成枱係仲要一人一杯啤酒埋單都係5千幾真係唔錯吃。
名古屋亂食、亂買十天自駕之旅 ~~ 第二天
名古屋亂食、亂買十天自駕之旅 ~~ 第三天
名古屋亂食、亂買十天自駕之旅 ~~ 第四天
名古屋亂食、亂買十天自駕之旅 ~~ 第五天
名古屋亂食、亂買十天自駕之旅 ~~ 第六天
名古屋亂食、亂買十天自駕之旅 ~~ 第七天
名古屋亂食、亂買十天自駕之旅 ~~ 第八天
名古屋亂食、亂買十天自駕之旅 ~~ 第九、十天
Haifu はいふう溫泉酒店 【飲食篇】
Haifu はいふう溫泉酒店 【房間、環境篇】
和菓子工作坊初體驗 ~ 生八つ橋
八坂圓堂
かつくら名代豬扒~~試食報告
Hotel Gracery Kyoto Sanjo 試住報告
越前蟹の坊
醍庵試食報告
箔一~東山店
VELICA AVEDA 金沢剪髮體驗
ざくろ居酒居
Hotel Wing International Premium Kanazawa Ekimae (Wing 國際酒店)住宿體驗
飛騨牛食べ処 てんから
玄品雞泡魚專門店
VIA INN Nagoya Ekimae Tsubakicho 名古屋站前樁町住宿體驗
名花之里
漁太郎試食報告
名古屋亂食、亂買十天自駕之旅 ~~ 第三天
名古屋亂食、亂買十天自駕之旅 ~~ 第四天
名古屋亂食、亂買十天自駕之旅 ~~ 第五天
名古屋亂食、亂買十天自駕之旅 ~~ 第六天
名古屋亂食、亂買十天自駕之旅 ~~ 第七天
名古屋亂食、亂買十天自駕之旅 ~~ 第八天
名古屋亂食、亂買十天自駕之旅 ~~ 第九、十天
Haifu はいふう溫泉酒店 【房間、環境篇】
和菓子工作坊初體驗 ~ 生八つ橋
八坂圓堂
かつくら名代豬扒~~試食報告
Hotel Gracery Kyoto Sanjo 試住報告
越前蟹の坊
醍庵試食報告
箔一~東山店
VELICA AVEDA 金沢剪髮體驗
ざくろ居酒居
Hotel Wing International Premium Kanazawa Ekimae (Wing 國際酒店)住宿體驗
飛騨牛食べ処 てんから
玄品雞泡魚專門店
VIA INN Nagoya Ekimae Tsubakicho 名古屋站前樁町住宿體驗
名花之里
漁太郎試食報告
🌻喜歡請比👍Like👍(多謝咗先,我會繼續💪)
🌻歡迎各位分享、讚好及追蹤【王家飯館】的網頁、Facebook、Instagram、YouTube
沒有留言:
發佈留言