名古屋亂食、亂買十天自駕之旅 ~~ 第五天

Day 5：京都

日期：2019-01-21

一早起身就過對面間Cafe食早餐，因為夠就腳就選中佢食物唔差又無咩人，應該係太早嘅關係，由於今日要去伏見稻荷大社要一早去先得，唔係就只會睇到人山人海嘅場面。

根據地圖搵到最近嘅停車場，收費都唔平不過就慳番唔洗行咁遠路先去到。可能係早嘅關係停車場有位但要留意番每個停車場都唔大，如果晏咗就要泊得比較遠，到時都係要行一大段路。早亦有第二個好處，就係無咁多人可以影到唔係人山人海嘅景觀仲可以慢慢欣賞。

但係一到10點就人頭不斷，太多人有時真係無心機行，而且要等一啲無咩公德心嘅遊人擺POST影相，等完一個又一個真係令人煩厭。

見到人頭不斷湧上山頭，路會越行越難，所以就決定响呢度影張相就番落山，呢個決定係無錯，因為落山呢段路就似年三十晚行花市咁多人。

呢個景點係王大少想睇下鳥居，但係轉個頭見到嘅人海佢都忍唔住叫走。因為係旅遊熱點真係無辦法，只能到此一遊。

趁住未夠鐘食晏就去金網つじ入貨，上次買過燒烤網真係好好用，燒魚特別靚仔，因為有個隔火網令火唔會直接燒到食物而熱力又平均，咁就無咁容易燒焦而肉身仍然保持肉汁，燒多士仲好靚仔。價錢係買咗少少，全人手造係物有所值。今次想買個烤魷魚嘅網，店舖雖小但種類多，搵咗好耐先見到掛咗响牆角。

除咗魷魚網仲買咗兩個吉列豬扒隔油網，因為王大少好鍾意响屋企食吉列同天婦羅，用網會保持脆度又隔油。

魷魚網大約¥5000
吉列豬扒網大約¥2000/1個
由於只收現金，比完錢就唔記得咗喇...哈哈。

跟住就揸車過去食午餐，王大少好鍾意食煎炸嘢，上次去京都試過点邑嘅天婦羅已經覺得好好味仲諗諗不忘，今次再嚟京都佢都有再三提我記得要訂位，不過經過一輪爬文後想試試新嘢，記得點邑無得泊車就揀咗八坂圓堂。有時真係唔可以盡信，無留意到去八坂圓堂嘅帖文好多都無去過点邑，呢個係我嘅大意。

上次去點邑無訂位，無得坐响Bar枱睇住師傅烹調，不過去到有位都偷笑。今次訂好位就可以坐到Bar枱，親眼睇住師傅整就好有感覺，咁先算係天婦羅。

同樣都係响Hot Pepper訂位，同樣都係訂午餐。揸車嘅朋友要留意餐廳係無泊車，要幫襯附近嘅停車場，食完餐飯就用咗¥800泊車，無去格價睇吓邊個停車場平啲，只係搵個就近嘅停車場。

今次預訂咗お昼の天ぷらコース「祇園」 ，全餐有14種食品，相信能夠滿足到王大少嘅口腹。
一開始有涼菜同魚生，今次件豆腐唔錯而魚生就一般。
想知試食全文請按我

食完飯就過去錦市場行下，今次只係經過有次刀但就無買到，雖然上次買果把刀係好好用，但因為打理都好煩，有一把就夠。而今次再嚟錦市場重點係要買王大少最愛嘅漬物。上次嚟嘅時候王大少點都唔肯試食，佢就係咁嘅人，自己覺得係點就點都唔會信人，不過今次我同佢講咗京都係出名漬物，佢先肯去試食。試過之後見到佢雙眼發光就知今次會大手入貨。

最後响桝俉買咗¥5432(HK$402)，不過大家要留意下最下面果4包已經發脹，睇番個包裝先知要冷藏，仲要係王大少話最好味果隻柚子大根壞咗，佢見到就相當心痛，仲係咁問係咪真係唔食得，係呀!脹到咁仲點敢試呢!仲買咗包醃醬等我可以番嚟再醃，不過個包裝係用橡根札住嘅膠袋，係好怕放入行李會爆，不過見到王大少雙眼發光我又點捨得拒絕佢呢!好在經過一輪包裝之後安全運番香港。呢個醬真係唔錯，洗乾淨啲菜就可以放入去，過幾日就已經食得，如果同王大少一樣都係鍾意食漬物嘅朋友可以帶定啲密實袋同食物盒去入貨，咁就安全好多。而且亦唔會受到食用日期限制住，可以食幾多整幾多。

 祇園はた源 ¥1600連稅(HK$118)

おちゃのこさいさい¥2052連稅(HK$152)
仲買咗幾款七味粉，紅色果隻同黑七咪係最辣但又最香最好味。

經過又見到有檔賣羊梗，响香港真係唔容易買到，所以見到就梗係要買啦。羊梗可以用嚟做涼菜同炒餸，健康又有益。個姐姐好搞笑，一開始用最平嘅細包叫咗你買先，到你話要佢就介紹你大包少少果隻有咩優惠，轉買大包少少果隻佢又再推多包啲嘅優惠，再咁落去真係收唔到手，最後用咗¥5000(HK$370)買咗包大送包細。再去對面店買咗啲魷魚同海苔，魷魚本身有味同嚟炭火燒或者入焗爐都得，兩款海苔都可以放入味噌湯同沙律都得，加埋用咗¥2000(HK$148)。

最後仲買咗包裝豆漿，因為聽日要去溫泉酒店住兩日，咁就有時間比我試吓部豆腐機。其實呢間豆漿都好出名，有杯裝同樽裝現喝豆漿行過可以試吓，仲有其他豆腐製品，如果响到住一排幾好呢，應該會成日嚟食到好嘢，唔怪得啲人話錦市場係京都嘅廚房。

係時候要去京都塔喇，唔係因為要上去塔頂睇風景，而係訂咗3點半去做和菓子。

想話去京都可以做吓金箔筷子、和菓子...樣樣都想試下，起初王大少唔係好願去做任何手作，但係諗嚟諗去又唔想做每樣嘢都只係得老公開心，所以就勉強去一次，不過就有一個要求係唔可以太難整，最後選擇做和菓子。

今次要做嘅和菓子地點响東京塔1樓，仲以為會有其他同學仔，點知成堂得我哋兩個，咁仲好導師可以睇實我哋呢兩個唔識日文嘅人。

入到去先會著件和式工作服，然後就睇一段十幾分鐘嘅片段，主要係介紹品牌歷史同製作過程，睇完段片後基礎粉團就蒸好，之後就會有張圖文並荗嘅單張加埋導師示範一步一步咁教你點做。(詳細資料及觀看全文請我)

嚟京都塔除咗做和菓子外仲有線香要買，呢間係京都都幾出名，我仲諗住王大少會挑大件又抵買嘅，點知佢今次買咗全店最靚果隻，仲有買夠兩盒…好我鍾意，反正都係要用嘅嘢，包好就唔會走味又耐放。老實講，唔知你拜果個收唔收到但至少留响屋企果個就索晒，以前佢一點香我就打"乞痴"，真係鼻都甩呀!上次响北海道我唔理佢買咗一堆，之後王大少就唔再用番傳統果啲，貴啲都係對自己好啲。見到個貝殼形香爐配櫻花托都幾靚，北海道買嘅小線香就可以用。

全部加埋¥18900連稅(HK$1380)，因為唔見咗張單唔記得分別幾多錢，香爐好似大約二百幾左右。如果想買就要留意，消耗品係無得做退稅。
最近先開始用第一盒，真心果句真係滿室清香，唔係點香精果種味道，我同兩隻毛小孩都無敏感，味道仲令人好放鬆、好舒坦。

由於食咗和菓子嘅關係唔係好肚餓，我就提議去酒店隔離間串燒店食就算，因為每次經過都比佢嘅香味吸引，不過去到發覺都幾多人等位，唔緊要啦咁近酒店就買外賣返房食都一樣啫。

味道唔可以話係一試難忘、驚為天人果隻，但都算唔錯吃。全部加埋都係¥3100(已經唔記得買咗幾多串)，再加埋之前買嘅小蕃茄咁同啤酒又一餐。

名古屋亂食、亂買十天自駕之旅 ~~ 第一天

名古屋亂食、亂買十天自駕之旅 ~~ 第二天
名古屋亂食、亂買十天自駕之旅 ~~ 第三天
名古屋亂食、亂買十天自駕之旅 ~~ 第四天
名古屋亂食、亂買十天自駕之旅 ~~ 第五天
名古屋亂食、亂買十天自駕之旅 ~~ 第六天
名古屋亂食、亂買十天自駕之旅 ~~ 第七天
名古屋亂食、亂買十天自駕之旅 ~~  第八天
名古屋亂食、亂買十天自駕之旅 ~~  第九、十天

Haifu はいふう溫泉酒店 【飲食篇】
Haifu はいふう溫泉酒店 【房間、環境篇】
和菓子工作坊初體驗 ~ 生八つ橋
八坂圓堂
かつくら名代豬扒~~試食報告
Hotel Gracery Kyoto Sanjo 試住報告
越前蟹の坊
醍庵試食報告
箔一~東山店
VELICA AVEDA 金沢剪髮體驗
ざくろ居酒居
Hotel Wing International Premium Kanazawa Ekimae (Wing 國際酒店)住宿體驗
飛騨牛食べ処 てんから
玄品雞泡魚專門店
VIA INN Nagoya Ekimae Tsubakicho 名古屋站前樁町住宿體驗
名花之里
漁太郎試食報告

🌻喜歡請比👍Like👍（多謝咗先，我會繼續💪）

🌻歡迎各位分享、讚好及追蹤【王家飯館】的網頁、Facebook、Instagram、YouTube

google.com, pub-3073176370794589, DIRECT, f08c47fec0942fa0