名古屋亂食、亂買十天自駕之旅 ~~ 第七天

Day 7：三重縣

日期：2019-01-23

可以自然醒真係一種福氣，王大少就成日都有呢種福氣。我就天未光醒咗，咁都好丫可以影下日出，睇住個天慢慢變光，個海面仲有一層輕煙，心情放空係都市人難得嘅時光。一個人靜靜哋都唔錯，多謝王大少比呢個機會我。

等王大少自然醒之後梳洗好就落樓食早餐，當然佢係會浸番次先肯出門口啦。

和食早餐(第二日)

朝早浸完先去食早餐，同晚餐係同地點，應該係話呢兩日嘅日晚餐都係同一個地方，同一張枱。

早餐可以選和式或洋式，入住時酒店職員已經幫你安排，既然住兩日就梗係試晒兩款。其實一真對日式早餐無咩好感，始終我哋嘅生活習慣唔係朝朝食飯，不過呢間酒店嘅評語令我想試下。

樣樣都好味，中間果款漬沙甸魚連王大少都話唔腥，不過碟小魚仔就點都唔肯試

茶碗蒸當然好滑，原來配蔥花同日本芥辣都幾好

睇王大少個樣就知只係得白飯同漬物佢都可以食晒成碗飯

伊勢龍蝦味噌湯有水準，不過令我諗起尋晚個刺身拼盤…不過除咗個龍蝦頭之外仲有蟹，所以個湯好甜

食飽咗响酒店四圍行陣就返房，換件衫就出去今日嘅行程，原本呢個行程係安排响離開酒店之後，因為我哋都以為無船出返嚟，但原來每日都有時間表安排船隻往來，只要向職員查詢便會安排。咁樣都幾好，後面行程可以輕鬆啲又可以出去搵下嘢食。

由碼頭揸車過去大概30分鐘，【真珠之里】有兩個免費停車場可以泊，泊好車仲要行一段路先到，沿路會有指示唔洗擔心搵唔到。沿途有好多好似橙咁嘅樹，結咗好多果實仲跌到一地都係，到底係唔好食所以無人要定係多到食唔晒呢?好想攞個試下，但又怕比人話偷嘢所以唔敢做(雖然個心好想…哈哈)。

今次我哋無預訂，因為行程總趕唔上變化，打算隨心而行，有就試下無就算數，點知去到一個客都無，唔知係咪時間尚早定係季節原因，不過咁樣仲好唔洗等樣樣嘢都快合乎香港人節奏。

首先會比你睇一段大約10分鐘片，內容係話你知珍珠係點嚟同埋介紹下呢個珍珠場特色，最後仲會話你知要點開珍珠同打磨，睇完之後就會攞一板珍珠貝比我哋挑選，每隻¥1000仲要包你有珍珠(由2019年4月1日起加至¥1500)，因為我揀第一隻入面係無嘅，所以要再揀過隻，仲會問你想自己開定佢幫我哋開，王大少好堅持要大嬸幫手，咁我都一樣啦。

大嬸開好咗就將珍珠交到我手，呢個時候就要放入有鹽嘅膠袋入面係咁捽，仲有沙漏計時嘅，攞番出嚟沖水後要再用類似眼鏡布再捽，都係要計時。

捽完你就可以揀想隻嘅飾物，我哋睇咗好耐都諗唔到想做咩，因為平日我唔帶手飾，仲成日都唔記得帶結婚介子，搞到王大少成日問我係咪唔記得自己已經結婚…哈哈!成日都有幢移動嘅建築物响身邊又點會唔記得呢?而其他嘅就係電話繩，不過而家仲有咩電話用得著呢?最後揀咗個放兩粒珍珠嘅鍊咀，咁就唔洗煩要再揀多樣啦。

加工到完成都係15分鐘左右，大嬸就將珍珠貝肉整好比我哋食，都幾滑同鮮不過就唔多肉，可能係將最滑嘅部份比我哋，其餘就比我哋去餵魚，就响出面個魚排已經有好多魚，餵完仲可以四圍行下，呢度風景真係唔錯，仲有個响海上屋嘅地方可以燒嘢食，但就要提早預約先得。望住呢個景燒烤都應該幾舒服。

呢款鍊咀只要加¥2500，項鍊係番香港配嘅

店員話鍊咀攞到後仲要等24小時後先可以帶，可能咁咁耐啲膠水先乾透，咁樣都好過要第二日再嚟攞丫。總括嚟講係一個難得嘅體驗，環境又靚又充滿原始風，順路不防一試。除咗開珍珠之外仲有海上BBQ、生蠔放題同釣魚活動。

真珠之里
地址：517-0704 １１２５-８８, 志摩町越賀 志摩市 三重県 517-0704
電話：0599-85-0515
網址：http://s-tamachan.net/

開完珍珠就要去醫肚，今次係無行程嘅，上網搵下附近有咩餐廳，仲上網睇下食評就搵到呢間餐廳。環境唔錯仲有架古董車放响門口比你影相，入面只有兩小口子主埋，不過又估唔到咁好食喎，賣相亦好。

牛油果雞肉沙律

芝士漢堡飯

SHEVRON CAFE
地址：〒517-0506 三重県志摩市阿児町国府3517−16
電話：+81 599-47-4747
營業時間：11:00 - 21:00

食完晏行咗陣就返酒店，返到去王大少又再浸，佢真係唔會浪費每個可以浸溫泉嘅機會。不過浸完食飯係好舒服嘅。

晚餐(第二晚) 

又到晚餐時間，入住當日已經問過職員兩個晚餐係咪一樣，點知佢話會唔同，咁就好喇我都唔想兩晚都食一樣嘅嘢。

酒蒸Moyota生蠔、香草醃三文魚、海苔炸帶子

味道唔錯，生蠔用酒蒸都唔錯吃。

魚生拼盤

一嚟到就令眼前一亮，仲以為尋日個龍蝦刺身拼盤已經係最好，因為好多網友都只係放咗龍蝦刺身拼盤出嚟，但今日呢個雖然唔似尋日果個咁大盤，但份量一啲唔少仲有我最鍾意嘅海膽。蝦同白身魚淡香清甜，油甘魚夠肥美，海膽又甜又香，仲要一啲都唔少氣，唔會只係放面頭見到咁少，係有成大半杯。

膠原蝦湯非常清甜

香蒜蒸伊勢雞

呢個雞好夠肉味又夠嫩滑，係我哋兩個一致讚好。

焗伊勢龍蝦

龍蝦肉嫩鮮甜，不過王大少唔食龍蝦，我可以一人獨享。

黑椒煎牛扒

呢份牛扒比尋日好食好多，可能係少咗醬汁所以牛味突出，又煎得啱啱好又會太熟又夠油花。我只係食咗一件，其餘都比晒王大少，因為龍蝦佢無食到咁都要留番啲好嘢比佢食先得。

炸魚塊~都係水準菜式，唔愛吃魚嘅王大少都食成碟食晒

蠔肉炒飯、白味噌湯、漬物

芝士餅、水果

我比較鍾意尋日個奶凍多啲，因為呢款芝士餅實在太甜了。

名古屋亂食、亂買十天自駕之旅 ~~ 第一天

名古屋亂食、亂買十天自駕之旅 ~~ 第二天
名古屋亂食、亂買十天自駕之旅 ~~ 第三天
名古屋亂食、亂買十天自駕之旅 ~~ 第四天
名古屋亂食、亂買十天自駕之旅 ~~ 第五天
名古屋亂食、亂買十天自駕之旅 ~~ 第六天
名古屋亂食、亂買十天自駕之旅 ~~ 第七天
名古屋亂食、亂買十天自駕之旅 ~~  第八天
名古屋亂食、亂買十天自駕之旅 ~~  第九、十天

Haifu はいふう溫泉酒店 【飲食篇】
Haifu はいふう溫泉酒店 【房間、環境篇】
和菓子工作坊初體驗 ~ 生八つ橋
八坂圓堂
かつくら名代豬扒~~試食報告
Hotel Gracery Kyoto Sanjo 試住報告
越前蟹の坊
醍庵試食報告
箔一~東山店
VELICA AVEDA 金沢剪髮體驗
ざくろ居酒居
Hotel Wing International Premium Kanazawa Ekimae (Wing 國際酒店)住宿體驗
飛騨牛食べ処 てんから
玄品雞泡魚專門店
VIA INN Nagoya Ekimae Tsubakicho 名古屋站前樁町住宿體驗
名花之里
漁太郎試食報告

🌻喜歡請比👍Like👍（多謝咗先，我會繼續💪）

🌻歡迎各位分享、讚好及追蹤【王家飯館】的網頁、Facebook、Instagram、YouTube google.com, pub-3073176370794589, DIRECT, f08c47fec0942fa0