Day 9 ：名古屋
日期：2019-01-25一朝早就去咗名鐵百貨7樓買家品，今次想入手嘅係暖桌被，雖然係好重但香港真係好難搵到又唔想買國貨，只可以就今次嚟睇吓有無好嘢。買到當然開心啦仲要係買得平先係重點，除咗套被仲買多兩個壓縮袋，不過呢隻唔係電動都要同王大少花咗唔少氣力先放到入喼。
買完嘢就要出發去 今次搵咗呢間海邊濱燒場，除咗可以濱燒之外仲可以堂食海鮮丼。之前上網咗好耐都唔覺有呢間嘅資料，就算有都唔係太詳細膽粗粗就去試下，因為從名古屋過去都係一個鐘左右，朝早去完Outlet過去就啱啱好喇。
呢個門口入去就係一個海鮮市場，入面有海鮮同魚生之外仲有個食堂，唔想食燒烤都可以食海鮮丼，但係一場嚟到當然要試下濱燒啦。市場地方乾淨又多種類，分類清晰又明確，雖然明知係獨市生意及每種類只有一檔但都唔係開天刹價嘅市場，大家只要睇啱心水貨品就可以响市場買完海鮮及魚生再過去濱燒場燒烤而並不另收費。最好嘅係唔需要格價啱價錢就買啦!