Day 4：金澤 → 京都
日期：2019-01-20
响附近Starbucks食完早餐就返酒店執埋行李就要出發，因為要揸一個鐘頭車去福井縣嘅越前食蟹。為咗呢一餐都做咗唔少功課，不過資料真係唔多，可能地點比較偏遠令人卻步，的而且確係可以去其他地方都可以食到越前蟹，只係可能價錢會貴少少，但係難得嚟到就算遠都想食到正宗。
前一日响金澤食過加能蟹已經覺得好好味，對越前蟹就更加期待。今次揀咗一間傳統越前蟹店係因為唔想有任何差池令我錯失美味，呢間舖出名係因為佢做溫泉旅館一泊兩食，好多人都會因為呢餐蟹宴而訂房，當然溫泉景真係好靚，但大部份人都會大讚個晚餐。之後就响附近開咗間食蟹專門店同海鮮專賣店，以我分析大家都係賣同一樣嘢，點解會有好食同唔好食嘅分別，好多時關鍵都係買手，呢間旅館有多年入貨經驗先會得到客人欣賞。基於以上原因我就揀咗佢。本來都打算住番晚，不過已經有心儀溫泉酒店安排咗，亦唔想晚晚換酒店咁辛苦，所以最後決定只係食個午餐就算。
Day 3：金澤
日期：2019-01-19
朝早食過早餐就出發去兼六園，由於酒店近市區大約20分鐘就到，泊好車開始行過去，原本呢個行程都幾期待諗住影雪景，不過到咗金澤後就無咗，點解上次唔去丫！機會真係唔等人，如果上次唔係咁趕就可以見到雪景中嘅兼六園。櫻花未開只係有少少梅花，其實花園係好靚，只係未係我想見到果種。
攞返車就早少少去近江町市場食晏，魚市場都算係近年港人最喜歡嘅行程之一，但眼見好多魚市場越嚟越遊客化就有啲失望，唔再係大家所認識嘅地道、價廉物美、友善、新鮮嘅市場。縱然係咁但係會繼續去…哈哈。
唔跟劇本的結果
原本定好會去食燒肉，但係果刻又唔太想食，人有時就係咁，行咗個圈都無結果，就去返尋晚食飯果頭睇下，結果就去咗對面果間【醍庵】試下。
有時盲入都要睇彩數，今次運氣唔係太好，只係比佢個香箱蟹吸引就入咗去，地方夠大但唔太乾淨，見到咁嘅環境個心已經涼咗一半，不過餓總係要食，同自己講好又一餐唔好又一餐啦，雖然唔太似我哋嘅作風。
睇到呢度大家都估到個結果係點，但係都會詳細報告。
金箔雪糕初體驗
三年前安排得唔夠細心，金澤有好多想去嘅地方都去唔到，所以今次都預留多少少時間响金澤。可以去行吓東茶屋街同食吓指定嘅雪糕。真心果句預咗唔會好似Cremia果隻咁好食，但都想去體驗下好似要食過呢個雪糕先似去過金澤咁。
金箔雪糕¥900(HK$67)
食到成咀都係金箔都幾搞笑，日本嘅軟雪糕都唔會差得去邊，可以睇到製作過程都係賣點，不過我都係最愛Cremia。
加能蟹初體驗
魚市場都算係近年港人最喜歡嘅行程之一，但眼見好多魚市場越嚟越遊客化就有啲失望，唔再係大家所認識嘅地道、價廉物美、友善、新鮮嘅市場。縱然係咁但係會繼續去…哈哈。
見到有鰻魚串、即燒海鮮、即開海膽…等等，上次都有試過即燒海鮮有啲伏，海膽同生蠔都只係一般CP值唔高，有啲想食嘅海鮮都只可以坐响路邊食，睇落唔係真係咁想食，其中有間賣游水加能蟹都係買咗再去二樓食，响市場行咗三個圈都唔知想食咩嘅時候，王大少提議上二樓行過圈，搵到一間市の蔵嘅店舖，有熱食、魚生飯同游水加能蟹，就係咁我哋就坐低咗喇。
一入門口就見到個大蟹缸睇見就開心，呢個季節梗係食蟹啦，可以選擇全隻煲熟或者半隻刺身+半隻炭火燒烤，我最鍾意係刺身就梗係揀後者啦。
Menu 入面入好多套餐，要咗個海鮮丼+加能蟹，咁樣就已經夠兩個人食。
海鮮丼¥2500連稅(HK$185)
有好幾種魚類、少少蟹肉、三文魚子、蝦…等等
新鮮就係好味。無漬物、前菜，只係有一個味噌湯，可能係用蟹做嘅湯，味道唔錯。
剪頭髮嘅享受
預約咗4點响金澤Velica Aveda剪頭髮，攞咗車就即係過去金澤，自從上次响北海道試過一次之後就想再試，剪得好唔好就睇下你嘅接受程度同要求，我預咗唔係去開果種店舖就唔會用同一把尺去量，最起碼價錢就差至少3倍，又點好意思有同樣要求呢。如果真係對髮型好有要求都可以去做個染髮同洗頭，去見識下享受下人哋貼心又舒服嘅服務。
今次都係搵咗商場鋪，因為王大少唔肯去試就比個地方佢行下，我就可以靜心享受一下。金澤呢間同北海道嘅格局相似，只係比較少型。
入到去先係同髮型師溝通，用好簡單嘅英文就可以溝通，最好係搵定喜歡嘅髮型圖片就最方便，比髮型師睇下就跟到。今次揀咗洗、剪、染，成塊色版比你揀顏色，無色盲就得連講都唔洗。
再次回味
今次都係番尋味，搵返三年前呢間又平又好味嘅ざくろ居酒屋，好彩上次有影低張收據，要搵番就容易得多。
响酒店行過去都係5分鐘左右，唔洗揸車王大少就可以同我暢飲喇。上次係盲入今次就訂咗位先，因為上次好晏先去食飯，只係見到邊間想食又有位就入，今次想早少少又咁啱係星期五，唔想去到先知無位，況且响Hot Pepper訂位都好容易。
地址：石川県金沢市堀川新町2-53 セントラルアークビル3Ｆ
電話：050-5845-5090
網址：https://www.zakuro-kanazawa.com/
*有套餐可以選擇可以上網睇下，價錢都好扺
去居酒屋都係有人頭費小食每位¥380連稅(HK$28)，似荼樓飲茶比碟花生收嘅茶芥一樣，呢碟前菜王大少話好好味送酒一流，不過我已經唔記得咗係咩嚟。
Day 2：名古屋 → 白川鄉 → 金澤
日期：2019-01-18
朝早7點就起身，食完個免費早餐就出發，因為路程遙遠由名古屋揸車到白川鄕要兩個鐘，其實呢個行程可以去可以唔去，因為三年前已經到訪過仲睇埋點燈，不過之前仲未學影相，帶住部入門單反但係仲係用P Mode嚟影就真係同眼見有距離，我希望今次可將睇前見到嘅景象留下記念，仲會想去上次無去嘅相逢橋感受下有無【最美麗的第七天】嘅感覺。
而王大少就想再去食飛驒牛，仲話要去返上次果間，開頭都有啲頭暈，因為上次係臨時改行程去多次白川鄕為咗睇點燈，回程時又因為出到市區會好夜怕會餓死就求其入咗一間食，點知就比我地去咗間好好味嘅隠世小店，原本仲怕王大少會唔開心，話晒都係王大少嘅生日飯，但係佢就怕肚餓多過怕求其，唔想揸兩個鐘頭車先再食。亂入嘅後果係想搵番要睇番3年前嘅相搵下有無蛛絲馬跡可以搵得番呢間小店，不過都係無頭緒，最後問吓王大少有無印象，佢就地圖上身咁上去Google Map跟番當日條路線行，咁都比佢搵得番，上過Tabelog睇下啲相同我果張一樣就更加肯定，而且呢間舖分數唔低。(試食報告、價錢、位置請按我)
Hotel Wing International Premium Kanazawa Ekimae (Wing 國際酒店)
地址：〒920-0849 石川県金沢市堀川新町８−番13号金沢, 金沢
電話：+81762907776
房價：Double Room HK$393.6 /晚連稅
尺寸：20平方米
入住日期：18-19/01/2019
每次去旅行都會選擇一啲平得嚟四正嘅酒店，因為要留番啲銀兩住溫泉酒店嘛。就算要搵平之餘都唔可以太細，又唔可以同人共用洗手間。基於咁多限制可以選擇唔多，好多時都唔想煩上次住過OK嘅都唔諗就BOOK番，不過Confirm機票時已經BOOK唔番上次間酒店，又要再去個酒店海內尋尋覓覓，見到Agoda有個offer又幾抵喎，一晚都係3百幾仲要有20平方米，再睇下啲相見到都唔差，又近上次住果間酒店，咁就唔揸車都可以去番上次間居酒屋啦。行去鼓門都係幾分鐘，如果唔係自駕都好方便。去兼六園、金沢城公園、近江町市場、21世紀美術館都係30分鐘內可到達。
$100用10日嘅漫遊
12月頭收到CSL短訊通知可以買日韓限定數據日費計劃，可以用$100買10日24小時球數據通行證，只要回覆短訊就可以。其實除咗10日仲有一個係5日，不過咁啱要去10日當然就買10日啦，真係平得有啲過份，我諗佢都係想做Promo等人試用先會咁平，又真係好方便，唔洗換咭又唔洗帶多一舊Wifi蛋，輕鬆自在多了。
以前都試過當地換咭，唔同地方都有唔同嘅麻煩，去泰國同澳洲就一定排晒隊，日本可以响香港就買定，不過就試過唔識Setting搞到無得用，話晒唔係日日出門，又點會記得點用呢! Wifi蛋就方便啲，不過响香港租就要早一日去攞同返嚟即還，有時真係抽唔到時間又真係唔方便，去當地先攞都有幫襯開，不過個個機場唔同，有啲有專櫃就好啲同就腳，但無專櫃就煩，試過响北海道要行去國內航線果邊先攞到，行嚟行去都幾攰，還機果陣都係要咁行。講到尾最方便都係用呢個plan，如果成日去旅行嘅買月費都唔錯，而單日就$88/日，計落同租Wifi蛋差唔多，方便在唔洗行嚟行去搵地方借/還，仲可以上網上到最後一刻。
