開箱Yohome 家の逸 全自動洗衣機
上次試過半自動洗衣機，今次就試吓全自動又係咪好用咗先。
打開盒見到個洗衣機都幾大個，可能係上一代可以折叠比人感覺機身細好多，打開洗衣桶見到入面放晒所有配件同電線，拎晒出嚟望吓洗衣桶總係覺得咁細到底係咪有7L，上一代係9L同這個比較感覺上好似大一倍咁。
水龍頭配件都算齊全，即係屋企個水喉位都應該通用。同上一代一樣機底都有4個吸盤唔怕洗衫時部機會走佬，不過個出入水位同電源線插口好近，如果咁唔好彩收納時仲有水流出又會唔會好容易壞呢?
按鈕同上一代一樣都係得一粒，不過今次唔係只得洗幾多分鐘嘅選擇，而係可以選擇洗滌模式。由左至右排列包括[全自動洗程序]、[殺菌洗程序]、[桶自潔程序]及[單脫程序]4種可以選擇。
官網介紹嘅黃金容量係5件內衣褲 / 12隻襪 / 6件兒童衣物 / 3件輕薄衣物 / 1-3隻公仔 / 5-10隻化妝蛋，咁我就用12隻襪仔嚟做標準啦。磋埋一舊大約係一個小型足球咁大，即係大約可以洗幾多磋埋就知唔洗每次估估吓。 好似兩條面巾就大約一球，一條厚身少少嘅面巾就比一球大咗少少，Ikea嘅四方巾就大約6-7條。
洗衣內桶蓋有一個扣，外蓋就只係冚住無任何扣。第一次試放8條入去睇下放唔放得落，結果係放到滿滿咁可以冚埋但應該唔係好洗到。
今次會用10條Ikea四方巾做以下測試。
第一試就睇吓唔比水會點呢? 洗衣機會有幾吓响聲同第一粒燈閃閃吓，而說明書顯示進水異常都係會叫同埋係第二粒燈閃，到底係咪我試錯咗?開番水喉再按開關就會自動運行。
第二試係洗衣時打開頂蓋，同第一試一樣都係有幾吓响聲同第一粒燈閃閃吓，同說明書相同，合上蓋就會繼續運行。
再試吓放啲洗碗粉落去睇下到底啲四方巾有無被攪動均勻，經過第一次去水之後再揈乾時部機搖晃非常並發出頗大聲音。打開洗衣桶見到洗碗粉有部份仍然留响原來位置，而四方巾好似無被攪動過一樣。雖然已超出正常容量但洗衣機並沒有响起負載過大時4個燈同時閃亮的警示。到底要超出幾多先會响呢?
既然超量試唔到就攞返4條出嚟做返正常洗滌程序先。
今次揈乾時已經無咁大聲同震，已經去到可以接受程度。
完成整個程度大約30分鐘，洗完嘅四方巾濕度同大機洗應該差唔多，因為買咗乾衣機後已經好耐無晾衫喇😛，不過肯定比人手乾。
用洗衣機洗完嘅四方巾係86g，用人手係124g。攞返之前抽起果4條四方巾去測試吓[單脫程序]，完成後都係大約84g。
收納時記得將去水喉滴乾，污水倒灌都係洗衣機發臭原因為一。至於殺菌洗程序就影唔到比大家睇，因為說明書稱嚴禁使用時打開，所以係影唔到亦唔建議大家去試。
一個月後感
差不多兩日開一次機多數係用嚟洗內衣褲，因為懶唔想手洗而大機要入網袋又要分開胸墊，如果唔分開又會揈到走位同變形，加加埋埋嘅功夫都唔少所以先會考慮入手細機，買之前都有考量過上一代又真係好少攞嚟用，因為每次都要手動都真係幾勞心，既然唔想手洗又點會想用半自動機呢? 今次買之前都真係問過自己好多次係咪真係會用? 係咪真係啱用? 今次真係無買錯嘢，而家唔洗成日整胸墊而洗完都係攞去乾衣，應該襟用過大機洗嘅，長遠計買一、兩件內衣都貴過買部機，最開心係唔洗再用洗衣液洗廚房布，仲可以獨立洗。
沒有留言:
發佈留言