[王家心底話] 開箱樂天網購買咗咩?(廚房篇)蒸水蛋好幫手/洗米濾網/指尖鉗/關孫六廚師刀
今日同大家分享吓樂天網購買咗啲咩返嚟，先講一定係我好鍾意嘅廚房用品啦。
燕三条蛋汁濾網
呢個真係私心推介，王大少好鍾意食蒸水蛋，本身用緊嘅比較淺嘅隔油網過濾，但成日都响側邊漏出嚟又過得慢，搵咗好耐終於搵到個啱心水嘅濾網。
手抦用料扎實拎得好舒服，網邊有兩個掛鉤倒湯汁時可以掛响碗邊，但係做蒸水蛋就鉤唔到碟邊，除非你做茶碗蒸啦。
為咗試比大家睇就攞咗幾粒貓耳朵扮吓會浮嘅嘢嚟試吓，結果係四平八穩又無濺水，疏水仲好快喎。
跟住就試埋蒸水蛋，我都係用兩隻蛋加250ml高湯嘅比例去測試，平時會用蝦乾瑤柱果啲就隔咗水出嚟先用呀吓。呢個濾網對付我呢啲咁心急嘅人係卓卓有餘而蒸出嚟仲要好鬼滑，碟底亦唔見到有蛋清結埋，佢係做到晒講嘅嘢仲要係日本制造。
霜山洗米濾網
當年有姊妹話食咗燕窩皮膚靚就一窩風走去買嚟燉就係咁順手買咗個網，雖然燕窩只係買過兩、三次就無再食，但個網就用嚟洗米洗咗好幾年。會用呢種網去洗米因為以前好多電飯煲/西施煲都唔可以直接洗米，搵個湯碗去洗米都真係幾煩，以前唔煮飯都無咩用過個網㗎，係後嚟轉行做賢妻良母先學煮飯個網先至重見天日，雖然手炳斷咗但都可以繼續用只係無咁就手啫。咁啱見到可以洗米嘅網，呢個型同之前用開嘅好唔同，而呢款聲稱可以用埋嚟煮撈麵食時隔水，飛水炸嘢都啱用，不過打邊爐我就唔建議，除非你好鍾意洗啲難洗米都穿唔過嘅網。
呢個係放咗一杯米嘅份量，我覺得呢個已經到咗極限再多就洗得唔暢快喇。如果你屋企人多可能要分兩、三次洗，又或者買個大啲嚟用。
試洗米時就發覺佢本身好淺，如果咁樣洗就好易簁(西)咗出嚟，但我平時會响水喉下面洗就無呢個問題，不過都唔可以洗得太豪邁。
洗完嘅米水好似粥水咁色，洗第二次已經見到啲米水淺色咗好多，只係洗咗兩次啲米就有種睇得出嘅乾淨感覺。
瀡落飯煲果下真係好有Feel，以前果個會有唔少黐住响個網要拍番落飯煲，就係咁用咗一排個手抦就斷咗，新呢個只係有一粒米黐住，唔洗拍用手就拎走咗，相信呢個網可以長命啲。只係洗咗兩次再加水煮飯已經見到啲水好清。
呢兩個網手工好好唔會𠝹手仲有一種好高級嘅感覺，完全物有所值。
指尖鉗
柳宗理餐叉
関孫六套裝刀
呢套刀一啲都唔算貴仲要係日本製，除咗喜歡佢係刀抦連刀身無接口夠衞生，仲可以入埋洗碗機就最啱我心水，以我用刀嘅習慣真係唔會𡃶住用，要成日打埋同照顧嘅高級刀好快就比我用到打柴，千幾二千一把刀用得果一陣真係好鬼心痛㗎，所以都係買啲粗用又唔心痛就算，至少唔洗粗心去照顧，所以今次選擇咗呢套刀試吓可以用幾耐先。
廚師刀切菜非常清脆利落唔會藕斷絲連，切肉都唔洗點用力就切好，不過由於拍攝嘅關係嚿肉無响雪櫃攞出嚟就即時切咁順手。而磨刀石就真係好用都不得了，跟住步驟每格拉幾吓已經好好切，咁當然係用舊刀試啦，因為新刀一定係好切㗎喎。細刀就試過用嚟去羊架嘅肥膏，真係好順手又夠細緻，早啲買返嚟就唔洗好似上次起牛舌起得咁辛苦啦。
今次廚房嘢介紹住咁多先，有興趣睇我仲買咗啲咩就响留言話我知啦。
傳送門👇
燕三条蛋汁濾網 ¥1,320 (日本製)
霜山洗米濾網 ¥1,210 (日本製)
指尖鉗 ¥1,310 (日本製)
柳宗理餐叉 ¥560 (日本製)
関孫六套裝刀 ¥6,980 (日本製)
Follow us 👇🏻
王家飯館 Wong's Kitchen
IG
YouTube
wong_s_kitchen
沒有留言:
發佈留言