名古屋亂食、亂買十天自駕之旅 ~~ 第二天

Day 2：名古屋 → 白川鄉 → 金澤

日期：2019-01-18

朝早7點就起身，食完個免費早餐就出發，因為路程遙遠由名古屋揸車到白川鄕要兩個鐘，其實呢個行程可以去可以唔去，因為三年前已經到訪過仲睇埋點燈，不過之前仲未學影相，帶住部入門單反但係仲係用P Mode嚟影就真係同眼見有距離，我希望今次可將睇前見到嘅景象留下記念，仲會想去上次無去嘅相逢橋感受下有無【最美麗的第七天】嘅感覺。

而王大少就想再去食飛驒牛，仲話要去返上次果間，開頭都有啲頭暈，因為上次係臨時改行程去多次白川鄕為咗睇點燈，回程時又因為出到市區會好夜怕會餓死就求其入咗一間食，點知就比我地去咗間好好味嘅隠世小店，原本仲怕王大少會唔開心，話晒都係王大少嘅生日飯，但係佢就怕肚餓多過怕求其，唔想揸兩個鐘頭車先再食。亂入嘅後果係想搵番要睇番3年前嘅相搵下有無蛛絲馬跡可以搵得番呢間小店，不過都係無頭緒，最後問吓王大少有無印象，佢就地圖上身咁上去Google Map跟番當日條路線行，咁都比佢搵得番，上過Tabelog睇下啲相同我果張一樣就更加肯定，而且呢間舖分數唔低。(試食報告、價錢、位置請按我)

今次可以番尋味全靠王大少呢個人肉地圖，所以今次獎勵佢叫多一份單點牛肉…真係好好味呀！

食飽飽就上山去，因為行人實在太多，又無地方可以泊車，响村入面轉咗個圈就上觀景台，天氣唔多好不停落住細雪又無陽光，上到去見到都係人頭湧湧，當然無之前點燈咁多人，不過都唔少。可能係點燈時段，多咗個台比人影相，唔係自己影係有人幫你影，影完轉個彎落番去就會見到你張相，每張¥1500（HK$110/張)，當然係收遊客價啦，不過佢都會用你部手機幫你影幾張，唔係迫你買不過都買咗，上次果張仲多個套有白川鄕點燈夜景同一張細相都係¥1500，不過無加價都已經好好。三年前可以開住腳架慢慢影，隔離個日本伯伯教我點影會靚啲，不過今年已經唔可以開腳架。

跟住就要去相逄橋，上次因為就快天黑唔夠時間去又唔識點去無去到，今次搵晒資料同埋充足時間，唔係唔去丫嘛。但係點解…點解…點解唔係鄭嘉穎同周麗淇咁嘅！

景依舊靚但人多到一個點，唔好意思停低影下相，加上條橋唔去水，溶咗嘅雪就變成一個個水氹要好小心行，除咗自己要小心亦要留意你身邊有無啲著波鞋、皮鞋嘅遊客會因為唔想整濕自己對鞋就不停跳嚟跳去避開水氹，根本唔可以好好欣賞周邊風景，最失望嘅係一路行一路聽到有香港人不停埋怨…唉！又見到一個港女擺個"S"型要朋友幫佢影要影得自然啲，影咗幾張都唔收貨阻住後面嘅行人，小姐，都要你個樣自然先得囉，我幾想同港女小姐講你朋友係無辦法影到一啲唔存在嘅影像，不如番去Ｐ圖算啦，唔好難為你朋友又阻大家時間。

泊响呢邊停車場要收¥1000，但係行咗一陣就唔想再行喇，回程時又見到好幾個普通話小朋友响度擲雪球都咪話唔大刹風景。總括嚟講三年前無嚟錯，真係好似聖誕咭咁靚，今年見到雪嘅地方就有腳印同雪人，有無見過張聖誕咭有咁多腳印同雪人呢？除咗個飛驒牛之外無咩令我有再嚟嘅衝動。

行返去停車場時落起大雪，多謝你用風雪嚟歡送我，定係話我知你都有同感呢幾年過得有幾咁辛苦？

預約咗4點响金澤Velica Aveda剪頭髮，攞咗車就即係過去金澤，自從上次响北海道試過一次之後就想再試，剪得好唔好就睇下你嘅接受程度同要求，我預咗唔係去開果種店舖就唔會用同一把尺去量，最起碼價錢就差至少3倍，又點好意思有同樣要求呢。如果真係對髮型好有要求都可以去做個染髮同洗頭，去見識下享受下人哋貼心又舒服嘅服務。(想知預約、價錢同內容請按我)

嘆完呢個頭部護理之後就要去酒店Check-in喇，今次會住Hotel Wing International Premium Kanazawa Ekimae (Wing國際)，每次去旅行都會選擇一啲平得嚟四正嘅酒店，因為要留番啲銀兩住溫泉酒店嘛。就算要搵平之餘都唔可以太細，又唔可以同人共用洗手間。基於咁多限制可以選擇唔多，好多時都唔想煩上次住過OK嘅都唔諗就BOOK番，不過Confirm機票時已經BOOK唔番上次間酒店，又要再去個酒店海內尋尋覓覓，見到Agoda有個offer又幾抵喎，一晚都係3百幾仲要有20平方米，再睇下啲相見到都唔差，又近上次住果間酒店，咁就唔揸車都可以去番上次間居酒屋啦。行去鼓門都係幾分鐘，如果唔係自駕都好方便。去兼六園、金沢城公園、近江町市場、21世紀美術館都係30分鐘內可到達。(酒店住宿體驗、價錢請按我)

放低行李就要去食飯，今次都係番尋味，搵返三年前呢間又平又好味嘅ざくろ居酒屋，好彩上次有影低張收據，要搵番就容易得多。可以再去嘅都唔會失望，响酒店行過去都係5分鐘左右，唔洗揸車王大少就可以同我暢飲喇。上次係盲入今次就訂咗位先，因為上次好晏先去食飯，只係見到邊間想食又有位就入，今次想早少少又咁啱係星期五，唔想去到先知無位，況且响Hot Pepper訂位都好容易。(試食報告及價錢請按我)

名古屋亂食、亂買十天自駕之旅 ~~ 第一天

名古屋亂食、亂買十天自駕之旅 ~~ 第二天
名古屋亂食、亂買十天自駕之旅 ~~ 第三天
名古屋亂食、亂買十天自駕之旅 ~~ 第四天
名古屋亂食、亂買十天自駕之旅 ~~ 第五天
名古屋亂食、亂買十天自駕之旅 ~~ 第六天
名古屋亂食、亂買十天自駕之旅 ~~ 第七天
名古屋亂食、亂買十天自駕之旅 ~~  第八天
名古屋亂食、亂買十天自駕之旅 ~~  第九、十天

Haifu はいふう溫泉酒店 【飲食篇】
Haifu はいふう溫泉酒店 【房間、環境篇】
和菓子工作坊初體驗 ~ 生八つ橋
八坂圓堂
かつくら名代豬扒~~試食報告
Hotel Gracery Kyoto Sanjo 試住報告
越前蟹の坊
醍庵試食報告
箔一~東山店
VELICA AVEDA 金沢剪髮體驗
ざくろ居酒居
Hotel Wing International Premium Kanazawa Ekimae (Wing 國際酒店)住宿體驗
飛騨牛食べ処 てんから
玄品雞泡魚專門店
VIA INN Nagoya Ekimae Tsubakicho 名古屋站前樁町住宿體驗
名花之里
漁太郎試食報告

🌻喜歡請比👍Like👍（多謝咗先，我會繼續💪）
🌻歡迎各位分享、讚好及追蹤【王家飯館】的網頁、Facebook、Instagram、YouTube