石垣第一旅 ~ 西表島モンスーン民宿試住報告

民宿初體驗

今次係王大少第一次响日本住民宿，平時佢係幾咁嬌生慣養相信有睇開我個Bloglog嘅朋友都知道，而我呢…人越大越唔容易適應新環境，所以今次選擇住民宿對我哋嚟講真係一個好大嘅考驗。

其實西表島都有好多酒店式住宿可以選擇，不過就正正係朋友住過話唔錯而我哋又覺得好有特色，想响西表島呢啲唔人工化嘅地方影下星空，訓吓吊床感受一下大自然風味。

就係因為呢張吊床同呢個View吸引咗我哋，就算要排除萬難都要一試嘅民宿。有幾萬難呀?對住開民宿、青年旅社嘅朋友嚟講呢度可以話係嘆，但係對於去親旅行對酒店有一定要求嘅我哋就…記得第一次同王大少去北海道第一晚住响札幌市區嘅酒店只有14平方米，當初我只係覺得响市區唔洗住咁大，都係一早出咗去夜晚先返，可以留番啲錢住間好啲嘅溫泉酒店，但係王大少一入到房就面有難色仲要樣樣都唔滿意，又話間房焗又話厠所細…係，的確係咁，自此之後我無再搵過啲咁細嘅酒店房喇。
第二樣難係未試過共用洗手間同浴室，就算札幌間房幾細都叫做有自己嘅洗手間，我哋平時唔會响屋企以外嘅哋方大解(除非唔舒服就無得好講)，去到酒店第一件事係用消毒酒精抺乾淨先用嘅我哋又應唔應付到呢?之前我真係諗咗十萬個可能，最後都係响日本樂天訂咗一堆厠板套(用完可以沖走果隻)、消毒紙、旅行洗衣袋同洗衣粉番嚟。

第三樣難係我每朝都要食咖啡，即溶咖啡係滿足唔到我。唯有帶埋部旅行膠囊咖啡機希望可以解決得到。

講咗咁多麻煩嘢(其實唔講大家都知呢兩公婆有幾麻煩)就要講番呢間民宿喇，成間房一眼睇晒真係一啲都唔大，再加埋我哋無响碼頭寄存行李，要攞住咁多嘢搭車又搭船都真係幾煩，再加上房間唔大兩大一小行李再加埋個相機背囊，開咗床就無位行喇。所以嚟緊我地會先响碼頭寄存行李就可以輕鬆入西表喇。(想知碼頭寄存行李詳情請按我)
房間只有雙人房(可住兩個大人加兩個小朋友)，收費係每間房每個人計算，如果係單人住宿就要比雙人房價。每人每晚  ¥4000 + ¥800(早餐) + ¥1200(晚餐)，可以選擇要唔要膳食，我哋就係係全部都要啦，即係每人 ¥6,000/晚就有埋早晚餐，中午一般跟團游山玩水玩全日都會包埋午餐，如果好似我哋咁其中一日係出海半日就可以請民宿幫忙預備午餐盒 ¥500/人。

早餐同晚餐都係食飯，每人一份白飯任裝，唔好以為早餐要食飯會好多，食落又幾習慣喎!

每日都有唔同嘅配搭，有湯、魚、沙律、水果、漬物、紫菜同腸仔/餐肉。而每日用餐時間為朝早7點及晚上6:30。

晚餐同早餐一樣有兩個菜，一款炒一款煮再加一個沙律，主菜多數係魚但就每日唔用煮法，有時船長釣到魚仲會加餸。

 民宿主人(船長)養咗兩隻馬，每日都會放佢哋出嚟食吓草同行吓，我哋仲餵啲菠蘿皮比佢哋食(想餵食要問咗職員先好餵)

 涼亭對出係一大片海景仲有三張吊床，呢個位好好風，王大少都响度Hea咗唔少時間。我就試過一早出嚟睇日出，雖然多雲但都好靚。(只係用手機嚟影)

 呢個係連住飯廳嘅共用空間，有兩張長枱同幾張吊床，如果好曬嘅時候我哋都鍾意嘅呢度Hea吓，我仲試過真係訓著咗，不過好多住客都應該响呢度訓著過，張吊床實在太舒服喇。

食飯會响民宿嘅共用空間，其餘時間都會有其他住客睇下電視、玩吓電話，好多時我哋都係留响度同其他住客傾下計，我哋遇到幾位唔錯嘅住客，有晚佢哋仲攞咗枝白酒同我哋分享，我哋都會買啲菠蘿、零食一齊食，就係因為咁我先知道石垣有種菠蘿係有桃味嘅，大家傾吓計輕輕鬆鬆又一晚，呢個真係一個好難忘嘅經歷。

總結：
住咗响民宿三晚都無咩唔習慣，只係三日都去唔到厠所(呢個係我個人問題)而感覺困擾，王大少話覺得床舖比較薄有啲唔習慣，但第二日佢就話已經適應到。厠所乾淨到抺一抺就用得，我哋都無用過厠板套。每餐飯都覺得好好味，好有住家飯嘅感覺。

洗衣機有兩部可以用，每次都只係收 ¥200有埋洗衣粉供應，乾衣都會有室內同室外可以選擇。冷氣係由晚上8點到朝早8點，其餘時間係每小時 ¥100，我哋咁多日都無額外加錢開冷氣，其實只要打開房門開個窗就已經好大風喇。用埋下午都會出去共用區訓吊床，所以都唔洗開冷氣。民宿免費提供冷/熱水、即溶咖啡、茶包，樽/罐裝飲品另外收費(大約¥100起)，有汽水、啤酒等飲品。住客會有專用雪櫃，如想帶點水果或飲品到民宿都可以放雪櫃。
設備當然唔可以同酒店相比，但我哋更喜歡呢間民宿嘅人情味，見王大少曬紅咗就即時搵枝月桃蘆薈水比佢用，我做老婆都無佢咁緊張(其實係咪我做得唔夠好呢?)。

雖然住咗3晚但都係多雲到睇唔到星星，第二日其中有個民宿住客話我知佢尋晚睇到滿天星仲好靚，因為佢半夜去完洗手間好奇出去睇下就見到呢個景象，我哋就因為天未光就去機場搞到果晚等咗一陣都係雲就訓咗，就係呢一訓跟住果兩晚半夜起身都只係聽到雨聲…有些機會不是屬於我的。

溫馨提示：
訂房或活動可以响上船前打個電話通知民宿職員你會搭幾點船，到埗就會响碼頭見到接待你嘅職員。

住客及職員都好早就訓(大約10點左右)，所以入夜後要留意聲浪。
所有自費飲品及用品都係自己寫上白板度離開前結帳，大家講個"信"字用過就要記得寫番低喇。

房門係無鎖匙嘅，如果出去玩要放好財物。(可以鎖响行李箱)
好大沖涼房只有一個，大家用嘅時候要留意時間呀!

西表島Monsoon 西表島モンスーン
地址：〒907-1541 沖縄県八重山郡竹富町上原984-50

電話：0980-85-6019

網頁：https://iriomote-monsoon.com/ (可網上預約住宿及活動)

再戰石垣 27/9 - 5/10 

西表島浮潛、夜釣、波照間島、石垣海釣、米原浮潛
Maru 串燒店、はーりー椰子蟹、石垣屋、燒肉金城、十五番地、
一龍居酒屋、Papiru 人氣蛋糕店
西表島モンスーン民宿、Lulaliya民宿、Hotel WBF PORTO Ishigakijima、碼頭租車

石垣第一旅 ~ 行程簡介
30/5 Day 1：石垣機場 → 石垣碼頭 → Vanilla-Deli → 西表島モンスーン民宿
31/5 Day 2：西表島浮潛 ~ バラス島＆鳩間島一日遊
1/6   Day 3：西表島浮潛 ~ バラス島半日遊
2/6   Day 4：島料理あちまゆん → Lulaliya民宿 → ひとし本店
3/6   Day 5：深潛、浮潛睇魔鬼魚半日遊 → ちねんや～新川店
4/6   Day 6：深潛溫泉海底半日遊 → 石垣牛ケバブ Kaboo →  山ちゃんの部屋
5/6   Day 7：向日葵花田 → 平久保平燈塔 → Seven Colors → 米原海灘 → 石垣屋
6/6   Day 8：石田屋 Ishidaya → ANA International Hotel → China Shadow
7-8/6 Day 9~10：海釣體驗半日遊 → JA ゆらてぃく市場 → 石垣牛と海鮮の店 てっぺん

🌻歡迎各位分享、讚好及訂閱【王家飯館】的網頁、Facebook、Instagram、YouTube