2019-09-27 & 28 香港 → 石垣 → 西表島
再次光臨，感動萬分
同上次一樣落機就去碼頭食晏，今次無食漢堡而係走咗去公設市場附近嘅Banana Cafe，其實只係响Family Mart買完帶入西表嘅用品/食品就隨機搵下附近有咩餐廳想食就入去食，午餐有好幾款但我哋都只係要咗三文治，一份煙三文魚忌廉芝士三文治同一份厚切巴馬火腿三文治，套餐配有沙律或湯，我哋就因為行到好熱兩份都要晒沙律，其實都係生菜加啲沙律醋簡單又清新，而三文治就各有風味味道唔錯，唔好問我其他嘢好唔好食，但三文治就不錯吃。
Banana Cafe
〒907-0022 沖縄県石垣市字大川269-8
+81 980-88-7690
bananacafe.jp
食飽就上船入西表島，今次都係住响西表島モンスーン(民宿詳細資料請按我)，原本打算响碼頭寄存行李(碼頭寄存行李資訊請按我)，唔知係咪介紹過之後多咗人用呢個方案(其實個網頁都無幾多個Like又係咪真係有咁多人睇呢?)，去到時一個大號寄存櫃都無，又差唔多要上船就無去搵行李寄存站就搬埋上船喇，未搞過唔知要搞幾耐都係咪試喇。上船嘅時候雖然算不上陽光普照，但入到西表島就落大雨我哋個心都沉咗一吓，唔通西表島嘅星空唔歡迎我哋?上次已經因為多雲睇唔到，今次仲要落大雨…不過王大少話明天會更好喎!我哋又點估到颱風路線會轉移呢?嚟到西表島碼頭又點少得幫襯姨姨買月桃蘆薈水呢?呢度買￥900但出到市區就過千，其實我都唔明點解離島仲平啲。
原本訂咗當晚去夜釣但係船長話天氣唔好要改聽日，咁我哋就好自在咁留响民宿上吊床吹吹風，好不自覺地王大少又訓著咗喇!到咗晚餐時間先肯離開張吊床…真心好訓!
晚餐都係我哋啱口味嘅菜式，呢種住家嘅感覺又番嚟喇!
食完早餐就準備出海浮潛，今次仲遇到兩個香港女仔同我哋一團。天色唔錯水也很清，海龜我嚟喇!
始終都係第一次見到嘅西表島海底水係最清，今次雖然都唔差但去到深水位能見度就有好大分別。每次參加呢個浮潛團都見到兩隻海龜，唔好以為次次見到都係果兩隻，今次見到第一隻係無咗隻左腳而另一隻係响呢度見過最大隻嘅，佢哋唔係咖哩啡收咗船長錢响度做Show比我哋睇，只係船長知道佢哋每日嘅行蹤所以次次一落水無耐就會遇見。
浮潛完半日同以往一樣返民宿沖好涼再食飯糰便當，老板娘仲做咗同六月時食嘅飯糰便當一樣味道，當然都係同樣咁好味及同樣地又係因為太肚餓無影相。食飽响吊床休息嘅時候收到潛水公司通知聽日深潛因天氣關係取消了，正當同王大少諗緊點樣安排明天活動時就問問職員仲有咩活動明天係仲會繼續，一問之下先知個風轉咗方响吹到正…走唔到咪要留到復航先可以出番石垣? 呢個係王大少最擔心嘅事，所以佢不停同我講不如早一日返市區…王大少，你估真係講吓就有咩! 我都明白如果早一日離開係可以將後面嘅活動影响減到最低，於是即刻打去原本安排嘅旅館問下會唔會有房點知真係無房，即上Agoda搵下仲有咩房就見到第一間就係WBF Porto，重點係佢有房之餘仲要加埋稅都只係 HK$366.4 唔洗諗即訂。訂完房仲要打去租車公司問下可唔可以租多一日，即時回覆可以個心就即刻定晒，都係多謝民宿職員幫忙打電話先可以咁順利咋。
雖然順利安排好後面嘅行程但個心都係好唔舒服，諗起聽日就要走喇只係响西表島浮潛過一次深潛又泡湯，原本改期今晚去釣魚都睇怕要取消…就响呢個時候民宿職員問我哋今晚仲去唔去釣魚，浪就唔會好大只係怕會落雨啫…咁就梗係去馬啦，唔想連呢個活動都無埋。即時心情都好番晒，食完飯就出發。
王大少同我都係第一次夜釣，臨行前民宿職員仲好細心問我哋要唔要雨褛，我哋只係帶咗一件所以借咗一件去著，雖然颱風接近又怕會落大雨，但船長都甘願為我倆冒一次險。我哋無去到好遠，由碼頭出船只係10分鐘船程，但看見得多細小螢光小物四處亂竄，再加上滿天凡星，連肉眼都清楚可見銀河，真係一個難忘經歷。
一開始兩釣點都無魚，再換一個點王大少就有魚上釣，差不多每次都係唔識釣果個釣最多。不夠一個小時就釣到廿幾條真係一唔錯嘅收穫，但最激氣係3個平排釣就只有坐中間嘅王大少不停魚上釣…船長都不停笑少一放就有另外兩個一啲動靜都無，不過訓响王大少大脾望住條銀河就算無魚都無所謂。
返到民宿老板娘好關心問我哋收穫如何，你知啦做生意都希望客人可以開心，佢聽見我話有收穫佢都好放心，因為有幾多魚穫都唔及我哋開唔開心咁重要，當我話佢知釣到廿條嘅時候個個都好驚訝(包括其他住客)，齊齊走出去門口見下我哋有咩收穫。老板就由回程開始不停話唔好意思今次無大魚，其實大家都預咗咁嘅天氣都唔慌會有好收穫，呢種就係日本人最令人感覺窩心，亦係我鍾意呢間民宿嘅原因。
訓醒食埋個早餐就要離開民宿，怕天氣再變無船就煩喇。真係好唔捨得西表島，真心鍾意西表島嘅海底，不過因為颱風到來深潛被取消了，呢個係咪另一個理由比我再一次有藉口再嚟一次呢?
再戰石垣 27/9 - 5/10
西表島浮潛、夜釣、波照間島、石垣海釣、米原浮潛Maru 串燒店、はーりー椰子蟹、石垣屋、燒肉金城、十五番地、
一龍居酒屋、Papiru 人氣蛋糕店
西表島モンスーン民宿、Lulaliya民宿、Hotel WBF PORTO Ishigakijima、碼頭租車
石垣第一旅 ~ 行程簡介
30/5 Day 1：石垣機場 → 石垣碼頭 → Vanilla-Deli → 西表島モンスーン民宿
31/5 Day 2：西表島浮潛 ~ バラス島＆鳩間島一日遊
1/6 Day 3：西表島浮潛 ~ バラス島半日遊
2/6 Day 4：島料理あちまゆん → Lulaliya民宿 → ひとし本店
3/6 Day 5：深潛、浮潛睇魔鬼魚半日遊 → ちねんや～新川店
4/6 Day 6：深潛溫泉海底半日遊 → 石垣牛ケバブ Kaboo → 山ちゃんの部屋
5/6 Day 7：向日葵花田 → 平久保平燈塔 → Seven Colors → 米原海灘 → 石垣屋
6/6 Day 8：石田屋 Ishidaya → ANA International Hotel → China Shadow
7-8/6 Day 9~10：海釣體驗半日遊 → JA ゆらてぃく市場 → 石垣牛と海鮮の店 てっぺん
🌻歡迎各位分享、讚好及訂閱【王家飯館】的網頁、Facebook、Instagram、YouTube
沒有留言:
發佈留言