石垣第一旅 ~ Lulaliya 旅館住宿體驗

另類民宿體驗

由西表碼頭入旅館前先去食個晏先，原本諗住去邊銀食碗麵不過咁啱遇上星期日休息，只好四圍搵下有咩想食，星期日好多店舖都唔開最後入咗島料理あちまゆん叫咗個人氣牛肉麵同魚生丼都唔錯，海葡萄只要新鮮就好食，只係杯黑糖鮮奶咖啡味道有點怪，而且糖亦未完全溶解。整體嚟講食物唔錯，由於小店只得一人工作，所以大家等食物要耐心一點。

島料理あちまゆん
地址：〒907-0022 沖縄県石垣市字大川209-3 Kupuna Square 西
電話：+81 90-3790-2039

牛肉麵 ￥780

魚生丼 ￥980

海葡萄 ￥500

黑糖鮮奶咖啡 ￥450

 

旅館接待處

嚴格嚟講呢間似係一間旅館多過算係民宿，地下一層有用餐地方同前台，前台前面就係一個休息嘅地方，可以睇下電視睇下書。而餐廳除咗用餐時間要嚟招待客人之外其餘時間都係一個共用空間，鍾意嘅可以坐下上下網，佢哋仲有三線琴同一種類似非洲嘅結他可以比你玩下，大前提梗係要小心啲啦，我哋唔識玩呢啲樂器，所以只係扮下嘢影張相咋。聽佢哋講有時有啲客人即興都會玩下音樂大家高興一個晚上，不過我哋住呢三晚都無遇到只係其中一晚見到幾個日本人(附近居民)坐埋一齊飲酒傾計。呢間旅館嘅住客同之前間民宿好唔同，呢幾晚嘅住客多數返到房都唔會出嚟，所以兩個共用空間成日都唔會見到人。不過旅館職員非常親切好多時都會關心問候，有好多當地資訊都係由佢哋話我知。有無諗過去到一間由日本人打理嘅旅館可以用普通話溝通?有位職員因為之前去過深圳工作而學到一口流利普通話(以外國人嚟講真係好好，起碼好過我呢個香港人)。

Lulaliya
地址：〒907-0453 沖縄県石垣市字川平921-1
電話：+81 980-87-0059
網頁：lulaliya.com (可網上預約)

全間旅館只有8間房其中3間為單人房，雙人房每晚￥5,500/每人，連住兩晚以上￥5,000/每人每晚。房間內有兩張單人床及洗手間(單人房要共用)，露台可以望到川平灣方向及有衣架、衣夾可借用，朝早洗完半日就乾，如果唔想自己洗都可以去自助洗衣房(費用另計)。入門口將門匙插入供電位就會有冷、熱水及電，同一般酒店分別不大只係冷氣係系統係分開，通常離開都會關上避免浪費，如果擔心入房會好熱的話只要打開露台門就好大風。(唔建議無人時冷氣長開)

房間走廊有雪櫃係住客共用嘅，仲有冷、熱水、茶包及即溶咖啡免費供應，房間整體乾淨整潔，位客上房前要換拖鞋，所以地板好乾淨。如果去完沙灘返嚟响門口就有水喉可以沖洗亦有地方吹乾，建議大家唔好將沙帶入房。

附近就係坐玻璃船嘅川平灣，旅館天台可以望到川平灣個海，就算行過去都係兩分鐘左右，如果唔係天氣唔好就可以行過去影星空，不過呢幾日天氣都唔穩定唔想攞住咁多嘢過去落大雨就煩喇，所以有兩晚响天台影星星，因為地方都比較空曠及大家都比較早訓所以光害比較少。王大少就陪我影星空睇到訓著咗，佢話望住個星空真係好舒服好放鬆不知不覺間充滿睡意。

相比起ANA見到嘅星空有無光害係好重要，就算响川平灣風大又多雲都見到銀河，只係無前置物做點綴，嚟緊希望天氣好啲可以過去沙灘果邊影。

ANA 沙灘

ANA 沙灘

旅館地點近川平灣好處係去米原沙灘只係15分鐘車程，玩完返旅館沖個涼換件衫休息吓就可以去下個景點，米原沙灘潮汐漲退都有唔同風景，潮漲時海灘風景比較靚而潮退就可以近距離同魚仔游水。

不過大家要留意一種"白雀鯛"嘅魚比較有攻擊性，因為佢哋會响自己地盤種植海草作為食糧，如果有人進入便會攻擊，遇到要盡快離開免受傷，可以留意影片就知。

旅館附近亦有唔少食市其中有間居酒屋成日都滿坐只係今次行程排滿而未有機會嘗試，有日潛完水行過去川平灣果邊搵嘢食，其實川平灣真係幾靚只係當日天氣唔係幾好未有睇到最想見嘅石垣藍，望咗陣就去返十字路口間露天茶座要咗個石垣牛饀餅(￥800)、薯角(￥450)同炸熱狗(￥250)，唔係唔好食只係未去到要番尋味啫。


石垣牛ケバブ Kaboo
地址：〒907-0453 沖縄県石垣市字川平917-1
電話：+81 90-1086-2413

去平久保燈塔同市區入去差唔多時間，回程時可以去埋Seven Colors食個午餐，食物雖然賣相好但唔算得上特別好食而且價錢都唔便宜，但餐廳個景又真係幾靚，就算唔食午餐都可以飲杯咖啡同食個招牌打咭甜品。

Seven Colors
地址：〒907-0331 沖縄県石垣市字平久保226-523
電話：+81 980-84-5107

如果啱季節的話可以到Seaside Hotel附近睇向日葵花田都係5分鐘車程。

如有需要旅館可安排早餐，￥800一份好似比較貴但分量一啲都唔細味道仲唔錯，只要早一日同職員講就可以安排。

除早餐外仲可以安排BBQ￥4,000/位，但就要訂4位或以上先得，食物包括有石垣牛、島豚同野菜等等，不過我哋得兩條友係食唔晒。

再戰石垣 27/9 - 5/10 

西表島浮潛、夜釣、波照間島、石垣海釣、米原浮潛
Maru 串燒店、はーりー椰子蟹、石垣屋、燒肉金城、十五番地、
一龍居酒屋、Papiru 人氣蛋糕店
西表島モンスーン民宿、Lulaliya民宿、Hotel WBF PORTO Ishigakijima、碼頭租車

石垣第一旅 ~ 行程簡介
30/5 Day 1：石垣機場 → 石垣碼頭 → Vanilla-Deli → 西表島モンスーン民宿
31/5 Day 2：西表島浮潛 ~ バラス島＆鳩間島一日遊
1/6   Day 3：西表島浮潛 ~ バラス島半日遊
2/6   Day 4：島料理あちまゆん → Lulaliya民宿 → ひとし本店
3/6   Day 5：深潛、浮潛睇魔鬼魚半日遊 → ちねんや～新川店
4/6   Day 6：深潛溫泉海底半日遊 → 石垣牛ケバブ Kaboo →  山ちゃんの部屋
5/6   Day 7：向日葵花田 → 平久保平燈塔 → Seven Colors → 米原海灘 → 石垣屋
6/6   Day 8：石田屋 Ishidaya → ANA International Hotel → China Shadow
7-8/6 Day 9~10：海釣體驗半日遊 → JA ゆらてぃく市場 → 石垣牛と海鮮の店 てっぺん

🌻歡迎各位分享、讚好及訂閱【王家飯館】的網頁、Facebook、Instagram、YouTube