雙手提出警告唔用唔得喇

唔知幾開始洗碗後隻手就會痕，忍唔住"R"下仲會損晒成個星期都唔好，就算跟足消委會建議去買，試過幾隻都係唔得，所以洗碗呢項工作就交比王大少去做。不過近幾個月都發覺王大少有敏感情況，同我唔一樣嘅係對手唔痕但就不斷甩皮，睇見佢咁都幾心痛。

所以留意咗洗碗機一段時間，但大部份都係要裝先用得，只有少數可以放枱面用仲唔洗裝入水喉，不過王大少成日都話洗碗機唔乾淨，所以一直無行動，不過我哋兩個人雙手都話我哋知唔可以再等喇，上網睇過幾部，但係空出嚟嘅位置太細，只可以係Rasonic呢個款先放得落，又見到有間可以平到$1,760就問下啦，點知呢間又係玩我哋，上次訂三層蒸爐都係見佢平所以搵佢訂，點知網上落訂金之後就不停叫我哋轉兩層果隻舊款，過咗成十日都仲未有貨通知，我就好嬲叫佢退訂(因為咁啱又見到Big Big Shop 有做特價，差唔多價錢仲送一堆嘢就梗係即時轉啦)，好在訂金都退得快，不過就有個唔好嘅經驗囉。所以今次就算佢話旺角門市無現貨要落訂先可以轉貨，但我就點都唔會再落訂，唔想到最後又係拖我時間，無貨又叫我轉款。不過佢又話唔比訂金都可以幫忙轉貨，但係就要星期尾先有貨，好，我就信埋你呢次，睇下係咪可以平幾百。到最後都係無搵過我，仲要我再Massage佢都已讀不回，都唔知呢間公司係點運作。

上網搵過呢部機嘅用家評價唔多，大部份都係話大機好用，但係只可以放細機嘅廚房也只可以買呢個玩具喇。就係心血來潮同王大少去百老滙睇吓實物，點知去到見到做緊$1,880，心動不如行動。星期六買星期二就可以收貨，見到個箱都唔係好大個，亦只係大約10KG重，大煲同鑊就要用手洗，始終係洗少好多嘢，用咗一個星期王大少對手都好咗好多。

拆開箱拎出嚟插條去水喉就用得，條喉有1米長只要放响洗手盤附近就可以，因為洗碗機係用70度水溫去洗，所以要留意出水位會有熱水避免受傷。

跟機送咗兩包Finish洗碗粉、一個量匙同一個量水壺，部機係無一個特定嘅位置放洗碗粉嘅，只係隨便放响玻璃門上就得。

試過幾次都洗得唔錯，只係內籠真係細，唔可以一次過洗好多嘢，而家王大少放工返嚟會先放咗中午便當食具食咗先，食完晚飯先再洗，一次過就真係放唔落喇。如果4人家庭三餸一湯都勉強夠用，但係要留意餐碟22CM要幫幫手先可以啱啱好放得入，再大啲就唔得喇!

機身係觸感，只係得幾個按鈕簡單易用，分別有"Rinse"沖洗、"Quick"快速、 "Normal"標準、 "Full"強力、"Dry"烘乾，試過以上功能，各方面都唔錯，只係烘乾功能弱啲，要放得好小心唔好重疊同運作好長時間先乾，所以洗完之後唔想抺就放入乾碗機。

因為唔需要裝入水喉，每次洗碗前都要入水，到水位時會有聲音提醒。

試過放Round Casserole 16"同Oval Casserole 24都得，有時一個人用16"煮個喇沙啱啱好，原煲上又洗少隻碗，以為喇沙會好難洗，都只係用Quick Mode洗咗35分鐘就乾淨晒。