松葉蟹腳刺身+北海道牡丹蝦刺身
今次輪到松葉蟹腳刺身，王大少滿有期望都因為香港常見都係急凍熟蟹，刺身就真係少見，好想知道係咪真係好似喺日本食到嗰啲咁，試之前都有心理準備係會有差別，但內心深處梗係希望呢個差別係比較少。今次開埋個牡丹蝦刺身，兩個人食的話加多個上湯浸菜就可以飽肚喇。
松葉蟹腳刺身
首先講下解凍過程先，原本個袋係分咗兩層放蟹腳，如果用原裝袋解凍就無咁均勻，建議拆咗袋之後放入乾淨保鮮袋入面先至去解凍，唔係一次過食晒的話仲可以食幾多先整幾多都得。放保鮮袋後只要放响流水下大約15分鐘就完全解凍，如果覺得浪費食水就用水蓋過蟹腳浸住，每30分鐘換水直至蟹腳完全解凍為止。解凍後用廚紙吸乾水份上碟即可食用，記得要攞埋蟹剪先開餐，因為蟹殼部份都有滿滿蟹肉，千萬唔好放過。
食後感：
蟹肉軟諗有鮮味，仲有海水回甘，值得我用鮮磨日本芥辣去招呼佢。當然無响日本食嘅現殺咁新鮮好味，但呢個價錢就食到呢個質素就真係不可思議。
牡丹蝦刺身
解凍就同松葉蟹腳一樣就可以，如果你係鐘意食蝦頭的話可以原隻上碟，但係王大少唔食蝦頭，又唔鐘意拆蝦殼，我就先去掉蝦頭及蝦殼，用廚紙吸乾水份再上碟。蝦頭千萬唔好浪費，蝦頭要處理過先，首先就要去除蝦及剪蝦鬚及腳，清除沙囊後灑上胡椒海鹽入焗爐以180度焗七分鐘左右就食得。
食後感：
咪睇佢細細隻，食落味濃及鮮，王大少都話估唔到咁好味。蝦頭就卜卜脆又帶點咸香，最估唔到嘅係細細隻都有糕，未出爐已經流口水。
香腸
香腸方面有兩隻味道，一款係香蒜味另一款就係原味。兩隻香腸都好有肉香，解凍後煎香就食得，用嚟做早餐非常方便。絶對唔會好似雞肉腸嘅機械化肉味。個人喜歡味，但王大少就喜歡香蒜味多啲。
雖然仲有大白菜卷同鯖魚未試，但總括嚟講CP值高，王大少食完刺身就話幾時再訂，不過我話已經冇咗200蚊coupon優惠，而家買要$998一set，但係王大少都話$998都抵喎!不過好快就會去名古屋旅行，仲安排咗食越前蟹，食完返嚟先再算啦!可能到時又會有優惠呢!
開心事
仲有10日就去名古屋真係好期待，今次仲會去收貨，呢部豆腐機我用咗好多方法先訂到，其實價錢有啲貴，不過諗到王大少可以食新鮮豆腐就值得。
嚟緊會同大家分享呢部豆腐機同名古屋好玩好食好買，希望大家繼續支持。
🌻喜歡請比👍Like👍（多謝咗先，我會繼續💪）
🌻歡迎各位分享、讚好及追蹤【王家飯館】的網頁、Facebook、Instagram、YouTube