首輪試食
唔好話網友關心，就連自己都好心急想試吓有無中伏，所以尋晚就開咗蟹肩同原隻嚟試吓。攞咗件蟹肩拆肉做今晚嘅雜炊，另一件蟹肩同原隻就做晚餐。
1. 4L急凍熟松葉蟹肩腳…約680g
一件拆肉準備做雜炊，先拆蟹鉗個殼都幾硬，開嘅時候要小心啲，蟹腳就易開好多，可能係夠大隻所以連關節位都有肉，仲有幾濃嘅鮮味，一路拆一路流口水。另一件用LC Buffet鑄鐵鍋都係啱啱好放到，加蓋全程小火8分鐘就食得，因為蟹會出水所以唔需要無加水，再加上解凍咗一日一夜其實都未溶晒雪，攞出嚟都仲係有雪响面，唔知係咪個雪櫃太凍呢?
煮完出嚟都無咩水，拆開啲肉都係滿滿嘅，味道當然唔可以同日本即食同自己空運番嚟果D比啦，不過一定好過超市幾百蚊盒果啲同大隻啲。
2. 原隻松葉蟹
因為包裝無寫幾重(可能係我老花睇唔到)所以就磅吓佢有幾重先。
經過一日一夜解凍之後仲有4百幾克，以贈品嚟講真係大手筆。
由於未完全解凍，王大少試咗少少就話熱應該會好味啲，咁我就拆咗蟹膏放入阿拉丁180度焗7分鐘，主要係想佢熱唔係要食烤唔會焗大耐，但係蟹膏就要焗耐啲先香，所以攞咗蟹身出嚟食住先，再比多7分鐘焗個蟹膏。講樣嘢比大家知丫，王大少除咗大閘蟹會食膏之外，其他全部唔食，所以今次呢個蟹膏我可以一人獨享。YEAH!!!
食後感：
蟹肩比原隻蟹味重，大家都有海水味同鮮味，原隻蟹仲有好多膏，D膏又香又甜真係唔係幾信係贈品。唔好同日本果D比較，同超市盒裝比就好味好多，性價比高。雖然只係試咗兩款，但都唔覺得伏，仲可以話買到好嘢。不過當然要食埋其他果D先可以下總結論啦。
開心事：
早排好少寫Blog無同大家講用里數換嘅機票已經到手，用4萬里數就可以兩條友飛名古屋就梗係抵啦，所以呢個月不停咁安排行程、Book酒店、格價、爬文、睇食評同訂餐廳，都真係幾忙。下個月嘅同一日就Book咗越前蟹專門店食番餐蟹宴，爬文同睇食評都有唔少人話一生人點都要去越前食一次，所以都會有好大期望，到時再同大家報告食後感。
上次去咗白川鄉、高山、下呂同金澤，所以今次就去另一邊，不過上次去金澤只係夠時間去21世紀博物館放棄咗兼六園，所以今次會去金澤、京都、三重(志摩、伊勢)，到時再同大家報告。
🌻喜歡請比👍Like👍（多謝咗先，我會繼續💪）
🌻歡迎各位分享、讚好及追蹤【王家飯館】的網頁、Facebook、Instagram、YouTube
