印度洋上的星空
今次夾啱中秋假期去馬爾代夫，但係月圓影星空都係一件唔容易嘅事，要夾啱時間等月亮開始下降先可以睇到滿天星。
就算唔能夠影到天清嘅星空，但係每隔十幾分鐘就睇到流星都係值得。
原本有計劃影星流跡，不過咁多日都比較多雲，留咗個遺憾。
咁係咪即係比我有多個藉口再去多次呢?
星期六去咗Wine & Dine Festival美酒佳餚巡禮，好彩早去到所以無咁多人，但係行到3、4點時已經好多人。當日都幾熱，又無咩地方可以休息，行完都好攰。
兩公婆都鐘意飲兩杯，不過今次無買到紅酒，反而買咗9支氣泡酒、8支清酒同3罐鴨肝醬。
因為無食晏就入去，諗住睇下有咩好食，一去到見到A區都係小食又唔太啱食就入咗去"拍住嘗"中伏，啲嘢食唔太吸引價錢又貴，不過一場入到去唔食就走?當時仲好肚餓，焗食。
呢個話係招牌菜The Blue Burger，味道一般不過就要HKD80。啤酒味道OK HKD50
吉列牛肉三文治 HKD120，完全食唔到吉列只係食到一口粉，牛肉無咩味，麵包係脆與淋之間，伏中之伏。
我哋仲試咗黑白奶茶+蛋撻HKD30，奶茶好"鞋"，蛋撻唔熱。仲有日本蜜瓜HKD40一片同日本迷你紫薯HKD20大約6粒，蜜瓜幾甜但紫薯就有啲燶味。
我哋買咗2張入場券+2套HKD200套票，每套有8個品酒証同一個酒杯，仲有兩叠換領券，每套可以換到幾粒芝士，幾粒杏仁，幾粒雞粒，一包迷你薯條，兩塊餅干，一支水同一個鎖匙扣(不過咁早去都已經話派晒😓，响隔離果個女人仲好大聲話:咁早就無係咪唔想派呀!)
即場買咗11月11日响灣仔會展品酒入場券，HKD200買1送1仲送1隻杯，到時仲唔洗用品酒券試酒，想試邊支攞隻杯埋去就得，實際情況到時再同大家講。
🌻喜歡請比👍Like👍
🌻歡迎各位分享、讚好及訂閱【王家飯館】的網頁、Facebook、Instagram、YouTube
🌻歡迎各位分享、讚好及訂閱【王家飯館】的網頁、Facebook、Instagram、YouTube