飛騨牛食べ処 てんから

番尋味

王大少就想再去食飛驒牛，仲話要去返上次果間，開頭都有啲頭暈，因為上次係臨時改行程去多次白川鄕為咗睇點燈，回程時又因為出到市區會好夜怕會餓死就求其入咗一間食，點知就比我地去咗間好好味嘅隠世小店，原本仲怕王大少會唔開心，話晒都係王大少嘅生日飯，但係佢就怕肚餓多過怕求其，唔想揸兩個鐘頭車先再食。亂入嘅後果係想搵番要睇番3年前嘅相搵下有無蛛絲馬跡可以搵得番呢間小店，不過都係無頭緒，最後問吓王大少有無印象，佢就地圖上身咁上去Google Map跟番當日條路線行，咁都比佢搵得番，上過Tabelog睇下啲相同我果張一樣就更加肯定，而且呢間舖分數唔低。

今次可以番尋味全靠王大少呢個人肉地圖，所以今次獎勵佢叫多一份單點牛肉…真係好好味呀！店舖就响白川鄕不遠，車程大約5分鐘。

店鋪：飛騨牛食べ処 てんから
地點：岐阜縣大野郡白川村296-1
電話：81 5769-6-1661 (日間不設訂位，但可用日文問下晚餐訂位資訊)
網址：http://tenkara.jp/
全店只有6個BAR枱住、3張4枱及4張6人枱
*逄星期二休息，但都會有不定休日，要上網留意番公佈

呢間話明係小店但都有英文Menu，就算唔識日文同英文都可以看圖點菜。大家睇到啲相都知你點嘅菜同現實係一樣，大家可以放心。要留意番午餐時段會有不少當地人食飯，可以嘅話安排午餐時段前後去就多數有位。

名古屋出行前準備篇

$100用10日嘅漫遊

12月頭收到CSL短訊通知可以買日韓限定數據日費計劃，可以用$100買10日24小時球數據通行證，只要回覆短訊就可以。其實除咗10日仲有一個係5日，不過咁啱要去10日當然就買10日啦，真係平得有啲過份，我諗佢都係想做Promo等人試用先會咁平，又真係好方便，唔洗換咭又唔洗帶多一舊Wifi蛋，輕鬆自在多了。

以前都試過當地換咭，唔同地方都有唔同嘅麻煩，去泰國同澳洲就一定排晒隊，日本可以响香港就買定，不過就試過唔識Setting搞到無得用，話晒唔係日日出門，又點會記得點用呢! Wifi蛋就方便啲，不過响香港租就要早一日去攞同返嚟即還，有時真係抽唔到時間又真係唔方便，去當地先攞都有幫襯開，不過個個機場唔同，有啲有專櫃就好啲同就腳，但無專櫃就煩，試過响北海道要行去國內航線果邊先攞到，行嚟行去都幾攰，還機果陣都係要咁行。講到尾最方便都係用呢個plan，如果成日去旅行嘅買月費都唔錯，而單日就$88/日，計落同租Wifi蛋差唔多，方便在唔洗行嚟行去搵地方借/還，仲可以上網上到最後一刻。

名古屋亂食、亂買十天自駕之旅 ~~ 第一天

Day 1 ~ 香港 ~名古屋

日期：2019-01-17

早機去機場食早餐是常識吧!我哋都一樣，不過唔知係咪太耐無去機場，連翠華無咗都唔知(禁區內)，仲諗住帶個奶油豬上機食，周圍嘅食市都唔係想食，Lounge又大排長龍，見到McCafe唔多人就是但食啦，可能係太耐無食，又幾好喎。佢新出咗杯玫瑰Latte個樣唔錯，個味道亦唔差，同H字頭果間有得比(性價比一定嬴晒)，只係咖啡用咗較深烘焙嘅豆，有微微濃味但飲得過。

玄品雞泡魚專門店

雞泡魚宴

一早就訂好咗今晚食雞泡魚宴，其實王大少唔食魚嘅，但係上次去大阪黑門市場佢話想試下，可能係睇過杜如風介紹過，但係我諗咗一陣就話下次先啦，結果今次行程就加入呢間專門店，但去之前王大少終於忍唔住問係咪只係得雞泡魚咋，係呀!專門店嘛。原來上次佢只係諗住食少少雞泡魚生試下就算，點知我咁認真搵咗間專門店嚟整蠱佢…

呢間係位於名古屋市中心嘅雞泡魚專門店的確唔錯，訂咗醍醐套餐入面包括有炸物、火鍋、刺身、漬物、雜炊同甜品共六品，原本諗住番酒店前去名鐵地庫買蛋糕做宵夜，但係食完呢個餐已經好飽。

VIA INN Nagoya Ekimae Tsubakicho 名古屋站前樁町住宿體驗

VIA INN Nagoya Ekimae Tsubakicho 名古屋站前樁町

地址：愛知縣名古屋市9-13 Tsubakicho, Nakamura-ku 453-0015
電話：0524515489

房價：
19/1/2019 (星期四) Deluxe Double Room HK$668.45 /晚連稅 【訂房來源：Agoda】
24-25/1/2019 星期五、六) Deluxe Double Room HK$711.89 /晚連稅 【訂房來源：Agoda】
尺寸：19平方米

家庭用豆腐機測試報告

12分鐘就搞掂

王大少都幾鐘意食豆腐，但係好味嘅豆腐好難搵，現成買嘅靚豆腐存放期都好短，可以放耐啲嘅都有防腐劑，而且通通都唔係王大少想要嘅豆腐，佢話最好食嘅都係响日本，就算係細細嘅居酒屋啲冷奴都好有水準，所以我就上網搵下但係能夠搵到嘅資料唔多，呢個係响樂天見到嘅家用豆腐機，而且都只得三兩間綱網店有得賣仲要係唔做國外配送，咁啱會去名古屋旅行就膽粗粗問下呢間豆腐專門店可唔可以送去酒店代收，無諗過答案係可以…咁就梗係即刻訂啦。

移動浴室寶測試報告

雙11除咗買咗個洗眼鏡神器之外，仲買咗一部德國寶移動浴室寶，睇咗一段時間先決定，因為浴室窗口唔大無咩機啱用，所以見到呢部機身細又唔需要裝機折窗就已經心心眼😍。

一路以嚟都係用浴室專用暖爐，冬天時會長期放响浴室，沖涼前仲要預早至少半個鐘開機，等到夠暖先可以開始沖涼，而且坐地式令到凍天時浴室變得細咗，同埋發覺要開好長時間個浴室先至可以有一個相對適當嘅溫度，座地始終都係比較慢熱，未必咁快開打勻成個浴室，相反浴室寶就因為可以掛牆或放喺個枱面，覺得暖風會比較強勁。雖然風力夠，但就一啲都唔嘈，好似開咗最細風嘅笆蕉扇咁上下。

買嘅過程唔係好順利，連派貨都唔多順利，因為出貨期係10個工作日，但係過咗都未收到信息通知取貨，可能真係有好多件要派所以比較遲，查詢時職員都好客氣去幫忙跟進，大約兩星期貨品便到手。

到目前為只收咗貨兩個月，但就沖涼就唔係開咗好次，因為今年香港唔係咁凍，最凍果幾日我住呢區只有六度左右，但係我都只係用過開關，因為開最細已經夠用就算得六度，所以個搖控、 強風同高熱都無試過。有咗佢真係暖好多，再加上有個毛巾架，沖完仲有條暖毛巾係最窩心嘅。而呢排沖完涼後就開得最多，因為天氣好潮濕，開一陣就乾番晒喇，唔洗再搬個抽濕機入浴室係方便好多。

我嘅實測嚟講一個幾十呎嘅浴室係夠用嘅，但如果你個浴室係個百幾二百呎嘅話呢就要你自己去測試下，因為我無咁富貴…哈哈。

要入手價錢係其中一個考慮嘅因素，搵過好幾間都有唔同嘅價錢，官網原價$1,080，見過HKTV Mall有過限時優惠做$798，但係一開賣就無貨，其實唔係真心做特價就唔好放到咁大，再唔係就話優惠只做一部手快有手慢無，唔好等人得個睇字丫，真係有啲唔開心。但係過多一個星期就見到友和預告雙11有優惠，仲要平過HKTV，當然係有限量，所以要响做優惠時快手先得。咁啱响淘寶雙11時做優惠，一部電腦、一部手提電腦同兩部電話同時進行，真係有啲煩，不過都係辛苦一晚，而且王大少又肯幫手，雖然經過好多次付款斷線嘅威嚇，但總算搞掂。今次當然唔係轉眼無貨嘅手段啦，過一陣再上去望過都有十幾個人買咗，而個優惠仲响度，即係仲有貨啦，咁先叫做Promotion。

入手資訊：
品牌：德國寶
型號：HTW-220
官方原價：$1,080
入手價：$679 (包順豐站取)
來源：友和購物網

以下資料來自官方網頁

移動浴室寶

HTW-220

可掛鈎﹑掛牆﹑座檯，易裝易拆，隨心移動

兩段暖風模式配合吹風功能

適用於浴室、嬰兒房及辦公室等

PTC高效發熱技術，快速製暖，慳電節能

特設低風速環保模式

配備可拆式金屬架，供晾掛或烘乾毛巾或小衣物

• 型號 / 副型號
  HTW-220
• 電壓
  220-240 V
• 功率
  2,000 W
• 顏色
  白色
• 尺寸
  (H) 388 (W) 250 (D) 123.5 mm
• 包裝尺寸
  (H) 442 (W) 298 (D) 168 mm
• 淨重
  1.9 kg
• 總重連包裝
  2.4 kg

抱歉事：由於要準備去旅行而清空手機儲存量，結果手快快清埋幫浴室寶影嘅開箱相，只可以草草影張。

開心事：明天就出發，希望到時會影多啲靚相同大家分享。

🌻喜歡請比👍Like👍（多謝咗先，我會繼續💪）

🌻歡迎各位分享、讚好及追蹤【王家飯館】的網頁、Facebook、Instagram、YouTube

Rasonic RDW-J5W 洗碗機試用報告

雙手提出警告 唔用唔得喇

唔知幾開始洗碗後隻手就會痕，忍唔住"R"下仲會損晒成個星期都唔好，就算跟足消委會建議去買，試過幾隻都係唔得，所以洗碗呢項工作就交比王大少去做。不過近幾個月都發覺王大少有敏感情況，同我唔一樣嘅係對手唔痕但就不斷甩皮，睇見佢咁都幾心痛。

雪菜火鴨絲炆米

食咗兩啖王大少就話要Encore

王大少想食咗好耐，但係呢排就好少整呢類菜式，次次都係應咗佢就算，今次同王大少一齊買餸，佢聽到我話要去買燒鴨就問長問短，開估時係由個心笑出嚟，真係為食!

通常我會買上裝起肉，因為會多肉啲，如果人少可以只係買隻肶就夠，因為一個上裝我哋兩個人都要分兩餐食。

今次用煎方式，煎好米粉後淋上醬汁連鍋上，食到尾都熱辣辣，食咗兩啖王大少就話要encore，仲話希望可以帶便當……見仲有材料第二日就整咗個濕版比佢，如果加埋芽菜、韭黃同少少辣椒絲仲惹味。

材料：
雪菜 
米粉…1個
火鴨絲…100克
雪菜…50克
青椒切條…少許

調味：
雞粉…半茶匙
鹽…1/4茶匙
糖…1/4茶匙
蠔油…半茶匙
水…120ml 
生粉(埋芡)…少許
麻油…少許後下

烹調：

1. 燒鴨起肉切絲
2. 青椒洗淨後去囊切絲
3. 煮一鍋水滾後放入米粉，煮好後隔水放涼。如果未有即時烹調要先用濕布蓋好保持濕度(要睇下用邊隻米粉，如果用免煮米粉就放一盤水浸軟即可，要留意包裝上說明)
4. 以中火預熱1茶匙油放入米粉，鋪好後轉小火煎香後反轉煎香另一面後上碟備用
5. 以中火預熱1茶匙油後放入青椒及雪菜炒香，然後再加入調味料同埋水後轉中火煮滾後加入火鴨絲
6. 滾起加入生粉水埋芡煮至濃稠
7. 上碟前加入麻油拌勻後淋上米粉

可以煎香佢兩邊煎煎豆卜卜脆又或者煮好汁後加入米粉拌勻都可以
除此之外仲可以加入芽菜和韭黃同樣惹味

🌻喜歡請比👍Like👍（多謝咗先，我會繼續💪）

🌻歡迎各位分享、讚好及追蹤【王家飯館】的網頁、Facebook、Instagram、YouTube

GT Sonic X1 超聲波洗眼鏡神器

係時候要換喇

今次要開箱嘅係一個超聲波洗眼鏡神器，其實一直都有用開，只係舊果部已經係10年前買，大部又唔夠力，好多時都要洗好多次先乾淨，因為我無近視嘅關係，以前都係用嚟洗吓太陽眼鏡、首飾同手錶，後嚟四眼王大少用嘅機會比我多，但係機都幾大部，佢攞出嚟嘅機會都唔多，早兩年開始連我都要帶眼鏡喇，因為要考車牌，响日光下會有刺眼感覺，好難先可以睇得清楚前面嘅路，對自己同道路使用者都唔好，所以就配咗副全視線平光鏡，而最近又因為年紀大要帶老花鏡(其實唔係好想用呢個字眼，不過人總要面對事實，我已經安慰自己係因為早年太努力工作而疏忽照顧眼睛…哈哈)所以我又多一副眼鏡喇。我同王大少嘅眼鏡都係响日本配嘅，對上一次因為逗留時間配合唔到，所以只能配一副普通老花鏡，嚟緊去名古屋有10日時間，希望可以配到一副漸進鏡片，咁就唔洗睇字先帶咁唔方便。咁即係話我又會再多一副眼鏡，所以係時候要入手一個較輕巧又方便同馬力強嘅洗眼鏡神器。撞啱雙11呢個日子，除咗淘寶之外好多公司都有做一啲限時特價，本來一心係想入手德國寶移動浴室寶(購買過程中出現好多意外，詳情要遲啲先同大家分享)，除咗要睇性能外，格價都好重要，過程中搵到友和有限時特價就梗係唔放過啦，再睇埋其他優惠時發現呢個眼鏡盒，係時候入手喇!

呢個優惠係雙11時段做嘅，換句話講而家已經無呢個優惠，所以呢篇唔係廣告文章，我係真金白銀買，只係想同大家分享一吓用後感。雖然係有優惠，但實際唔係平咗好多，不過有得平總好過無丫。本來係可以淘，不過電器嘅嘢好似有行貨總好過淘完有問題，要進貨就煩，除非真係响香港搵唔到又或者係價錢差太遠，否則我都會選擇响香港買。

11月10號零晨落單，13號已收到信息可以去便利店取貨，出貨都算快。開箱見到個眼鏡盒外仲有一條電線同明書，不過咁簡單嘅電器我係唔係去睇說明書。

只有一個按鈕，即係開關都係佢，無其他功能可以選擇，就係因為咁先會簡單易用，而且洗眼鏡都唔洗有咁多功能都可以，只要洗得乾淨就得。

程式啓動為5分鐘，加入清水後我會再加入1-2滴洗潔精，咁樣就會令眼鏡上油份去除，放入眼鏡後按動開關，一按即動，好快就見到眼鏡邊位嘅污垢浮出，睇嚟王大少副眼鏡真係好污糟。清洗程式完成後睇到啲水真係好濁，所以我再換過水洗多次先安樂。第二次洗都仲有污糟嘢浮出嚟，不過就無第一次咁厲害，洗完過清水再抺乾就可以。買咗呢部機之後王大少明顯多咗洗眼鏡，可能係輕巧易用，王大少多咗洗眼鏡，連帶眼鏡週邊位置都少咗暗瘡同暗粒，眼鏡乾淨真係好重要。

除咗洗眼鏡之外，仲會放手錶同介子去洗，效果同洗眼鏡相同，都係好快就帶出污垢，總括嚟講係幾好用嘅。

入手資訊

型號：GT Sonic X1 家用超聲波清洗眼鏡機
原價：$459
入手價：$399
運費：$24 (便利店取)
*可選擇順豐或便利店取貨
到手價：$423
來源：友和網上購物

以下資料來自友和購物網站：

GT Sonic X1

GT Sonic X1 可攜式超聲波清洗機，只需加入清水，就可以立刻消除細微部位的污垢。機身輕巧，輕鬆在家享受眼鏡店水準般的專業清洗服務。
適用於眼鏡、首飾、錶鍊、假牙、矯正維持器、牙套、刮鬍刀、筆。

規格

• 產品尺寸: 長185 X 高 59 X 寬 98mm 
• 產品重量: 約 400g 
• 清潔槽內部尺寸: 長173 X 高 45 X 寬 82mm 
• 額定電壓: DC12V 
• AC適配器: AC100V~240V 
• 額定頻率: 50/60Hz 
• 消耗電力: 15W 
• 超聲波頻率: 40kHz 
• 清潔槽材質: SUS304 
• 清潔槽容積: 約 450ml, 上限 (MAX) 標準線約為400ml 
• 計時器: 自動斷電(約 5 分鐘) 
• 附帶品: AC 適配器, 使用說明書 

開心事

呢排同咗幾組朋友出去食飯，講咗好多嘢(可以話係吐咗一堆苦水)，總算放低少少令我超煩心嘅事情。雖然講完事情都唔會解決到，但有朋友嘅一聲關心同問候都已經滿足。

2019年嘅第一日，一個好耐無聯絡嘅舊同事Whatsapp我，話我係佢心裡面最感激同感恩嘅人，大家都知我對下屬都係用個心去教(可能只自己覺得係…哈哈)，無諗過要人記得同回報，開頭真係唔知邊個嚟，不過聽到都係窩心嘅。Yoyo，多謝你令我响2019年有個好開始。

仲有9日就飛，所有嘢都準備好喇，只係差未執行理同王大少仲未去攞國際牌同換錢。
我個心已經飛咗過去喇!雖然行程好咗，但每日都搵到啲景點想加入去，問親王大少意見佢都只會話要第一日就買【休足】，咁即係點呀?

🌻喜歡請比👍Like👍（多謝咗先，我會繼續💪）
🌻歡迎各位分享、讚好及追蹤【王家飯館】的網頁、Facebook、Instagram、YouTube