Butcher Cut JA和牛套餐 開箱報告
首輪試伏
講番啲牛扒先,以前去開Aeon買啲百幾二百蚊左右嘅牛扒間唔中吓食都唔錯,但裝修完之後換咗另一間就似乎無咩唔同只係價錢多咗大約三分一,而UNY嘅Dry Age係好靚,但又唔會富貴到個個星期都食囉。最後走上網睇下買開芝士果間嘅牛扒點(因為佢啲豬鞍唔錯㗎,下次介紹吓),但都唔係好啱心水,最後就响Facebook嘅廣告見到Butcher Cut,價錢唔算貴但又未去到笑呵呵咁平,最優惠都算係套餐,見到都有唔少人留言問過幾錢、有無貨…大家都知呢啲留言係可以買嘅,所以我就向谷歌大神請教一下,點知竟然一個留言都搵唔到…無人講?咩料呀!
Butcher Cut嘅選擇唔多來來去去都係得果幾個套餐好似唔係好專門咁,不過呢個價錢可以食到和牛又係一個唔錯嘅選擇喎,之前都有介紹過大家响HKTV MALL用$198就買到200G和牛套餐真係大件又抵食(已經好耐無再見過呢個套餐出現喇),如果呢間和牛有水準的話都咪話唔抵食。
CleanseBot 智能殺菌除蟎清潔機器人 試用報告
點樣除蟎呢?
首先要講講點解要選呢部機,留意番我唔係用買…係因為部機係用就嚟到期嘅里數換番嚟,當大家都要安坐家中無得飛嘅時候,計劃好嘅行程就要取消連換機票都可以慳番…就嚟到期嘅里數點算好?只可以上網睇下可以換到啲咩再作打算~
我只有14000里數到期,雖然用多啲里數可以換其他但都係無咩心水,响有限選擇之下只好搵啲有用途嘅用品,除蟎機械人都算係其中之一。用咗14530里數換番嚟嘅機械人到底好唔好用?上網換完只要兩個星期左右就送到上門,仲唔洗加任何費用。
再戰石垣 Part VI (完結篇) 波照間島 + Maru串燒店
2019-10-04 石垣 → 波照間島
由於今日要一早就去波照間島嘅即日來回旅程,所以前一晚就响便利店買定三文治做早餐,係咪一定要咁早?係呀,每日得三班船來回波照間島,如果天氣唔好就隨時取消。因為打風令行程改完又改,臨走前一日先可以去波照間打過卡咋,為避免最後一班船有咩意外就麻煩嘅關係,同王大少決定會先去個最近碼頭又出名嘅沙灘見識吓食個晏就返市區,起碼了解咗個地型次再去就會安排得好啲,仲可以考慮吓留兩日睇下星星同真正咁四圍行。
再戰石垣 Part IV 米原+じんべい+papiru cake+はーりー椰子蟹
2019-10-02 石垣 → 米原
今日換一換口味整咗三文治比我哋做早餐,食飽就可以去米原玩吓…
雖然天氣唔錯,但始終係打過風嘅關係水唔係太清。
玩咗一陣就返民宿沖涼食晏,記得走之前要同停車場職員講聲你會再返嚟,停車場費用係包一日。
再戰石垣 Part III 燒肉金城+十五番地+川平灣
2019-09-30 石垣 (風雨中度過)
第一次响日本遇到颱風
朝早一早就起身食咗個杯麵同烚蛋做早餐,話晒個風今晚就到唔想再四圍搵食嘢嘅地方,同埋要搬酒店烚熟咗就方便帶,雖然係烚蛋但都要做到糖心蛋王大少先會食嘅。根據上次嘅經驗知道由市區到民宿係有一段路經海旁嘅,所以佢好緊張想早啲去到民宿,避開大風時所做成嘅橫流,千其唔好睇少陣風,係可以令你由慢線吹到去快線,之前响沖繩試過都咪話唔驚,好在沖繩果次有兩條線,唔係就真係唔敢想像。石垣好多都係單線行車,特別係海旁果段路又窄又多彎,所以就想响個風未到之前入民宿先。
放低行李就趁無咩風出去睇吓有無食市開門,食對於王大少係一件好重要嘅事,只可惜附近舖頭都無開門,連泊响川平灣嘅船都全部去晒避風,真係好難得會影到張無船嘅川平灣。雖然望落去風平浪靜不過天色開始暗,其實果時仲係11點咋。
再戰石垣 Part II 石垣屋+島料理あちまゆん+Hotel WBF PORTO Ishigakijima
2019-09-29 西表島 → 石垣
離開,係為咗下次再來
食完早餐就要離開民宿就算有幾唔捨得都要動身,去到西表碼頭已經感受到颱風嘅威力,大雨到似香港黑雨咁搞到我哋成身濕晒,留意番我哋只係落咗車行去車尾攞行李,只要行兩步就有遮蔭都可以濕晒,好在預早咗時間去碼頭可以等個身乾啲先再上船咋。上船前都預咗會大浪,但都比想像中好,再加埋上船就訓著,所以唔會好怕。前一晚已經同王大少傾好早一日出番石垣要做啲咩,當然就係去超市入定貨先,雖然個風係聽晚先到,但因為今晚間酒店只係住一晚,如果要轉酒店又要入貨就會搞到好忙咁,唔合乎王大少嘅生活態度。而且打風果朝早先買實多人,所以一到埗就攞車再去超市,今次都係响石垣碼頭果間租車公司租車,同上次果個店員唔同咗,上次係無人响舖,打比佢好似响屋企訓緊咁,最後要等咗個幾鐘先見人,有諗過訂過第二間租車公司,但諗到要攞住啲行理搭巴士王大少就十萬個唔願意,所以比多次機會佢,好在今次店員一早做好準備等我哋,比完錢架車就已經泊响門口等。Ecoguard天然殺菌.除臭水製造器 測試報告
真係咁神奇?
買Ecoguard天然殺菌.除臭水製造器係因為想間屋除臭,因為有兩隻狗春天都會好濃狗味,而佢哋都係唔落街去大小二便嘅,所以平時都會用除臭用品,雖然寫到明係動物適用但都覺得味道好大,人都覺啲小毛孩咪好辛苦囉,不過見呢隻好似好天然所以好想試下。如果得嘅話屋企就可以買少好多消毒除臭化學品,咁樣對地球都好啲。其實無諗住寫呢個開箱文,因為懶得就懶(其實已經懶咗半年無寫BLOG喇),不過最近多人搵消毒產品見到網上好多類似嘅產品,價錢只係呢隻韓國貨嘅1/4,仲要係意大利、加拿大、台灣…製造,朋友們都問我得唔得,其實我無用過其他果啲唔知係咪真係得,不過可以分享一下買呢部機之前就做過少少資料搜集知道次氯酸水係點做同點用,但簡單嚟講呢啲全部都係經電解嘅水,只要加唔同嘅物料去電解就會有唔同嘅效果,重點係响某些條件下加入物料後經過特殊電解先會有殺菌作用嘅次氯酸水(例如加入鹽),詳情可睇番維基百科。
訂閱:
文章 (Atom)