對住個海BBQ
其實未出呢個Post之前已經介紹過幾個朋友去呢個市場,有燒有唔燒,其中一個仲响上機前再走一轉都係為咗將幾條"一夜干"帶返香港,我成日都以為做呢個網誌唔係好多人睇,只係為咗第時要搵返資料會方便啲,搵食譜就即刻搵到自己嘅味道,但原來都可以幫到人,希望繼續可以幫到大家搵到更多好去處。今次搵咗呢間海邊濱燒場,除咗可以濱燒之外仲可以堂食海鮮丼。之前上網咗好耐都唔覺有呢間嘅資料,就算有都唔係太詳細膽粗粗就去試下,因為從名古屋過去都係一個鐘左右,朝早去完Outlet過去就啱啱好喇。
呢個門口入去就係一個海鮮市場,入面有海鮮同魚生之外仲有個食堂,唔想食燒烤都可以食海鮮丼,但係一場嚟到當然要試下濱燒啦。市場地方乾淨又多種類,分類清晰又明確,雖然明知係獨市生意及每種類只有一檔但都唔係開天刹價嘅市場,大家只要睇啱心水貨品就可以响市場買完海鮮及魚生再過去濱燒場燒烤而並不另收費。最好嘅係唔需要格價啱價錢就買啦!